Rusiyede mahküm etilgen qırımtatar halqınıñ lideri Mustafa Cemilevniñ oğlu Hayser Rusiye vatandaşlığını qabul etmeycegine dair tekrar ariza yazdı. Bunı adliyecisi Nikolay Polozov bildirdi.
«Hayser 2014 senesi yazda Aqmescit apishanesinde yatıp, Rusiye Federatsiyası vatandaşlığını qabul etmeycegine dair ariza yazğan edi. Krasnodar ülkesi mahkemesi ve Rusiye Federatsiyası Yuqarı mahkemesi onı Ukraina vatandaşı olaraq tanıylar. Şimdi vatandaşlıq ile bağlı qapalı meseleni tekrar kötermege ne acet bar. Nasıl olsa da, bugün Hayser Rusiye vatandaşı olmaycağını ve eskisi kibi Ukraina vatandaşı qalğanını arizada bildirdi», – dep yazdı Polozov Facebookta.
Onıñ bildirgenine köre, «Qırımdan Hayser Cemilevniñ Rusiye vatandaşlığını qabul etkenine dair vesiqalar keldi». Polozovnıñ aytqanına köre, 2014 senesi baarde Qırımda yaşağan Ukraina vatandaşları «avtomatik sürette Rusiye vatandaşı oldılar, amma er kes buña razı olmadı».
Rusiye Federatsiyasınıñ Yuqarı mahkemesi Krasnodar ülkesiniñ mahkemesi Hayser Cemilevge bergen 5 yıllıq apis cezasını bir buçuq yılğa qısqarttı. Kiyevniñ Dnepr mahkemesi 2015 senesi aprel ayında onı 3 yıl ve 8 ayğa qadar apiske almağa qarar aldı.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.
Keçken sene iyül 10 künü İnsan aqları boyunca Avropa mahkemesi Hayser Cemilevni SİZOdan azat etmek qararını çıqardı. Rusiye bunı yerine ketirmedi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
