Qırımtatar halqınıñ milliy lideri, Ukraina prezidentiniñ qırımtatarlarnıñ işlerinden vekâletlisi Mustafa Cemilev Litvaniyanıñ Vilnius şeerinde keçirileyatqan Dünya qırımtatar kongressi İdare şurasınıñ toplaşuvında «serbest dünya Rusiye işğal etken Qırımda Rusiye rejimi ile küreşke qoltutacağına» ve bu rejim çoq dayanamaycağına ümüt etkenini aydınlattı.
Bunı Cemilevniñ matbuat hızmeti bazarertesi künü, aprel 11-de, Facebookta bildirdi.
Mustafa Cemilevniñ qayd etkenine köre, Litvaniyanıñ qırımtatarlar içün «hususiy bir timsal rolü» bar.
«Ümüt etemiz ki, Qırımda Putinniñ yarım faşist rejimi çoq dayanmaz, ve serbest dünya küreşimizge qoltutacağına ümüt etemiz. Qırımtatarlarnıñ birinci hanı Devlet Geray doğğan Litvaniya bizim içün hususiy bir timsal rolüni taşıy», – dedi o.
Vilniusta aprel 11-13 künleri Dünya qırımtatar kongressi İdare şurasınıñ toplaşuvı keçirilmekte. Konferentsiya Litvaniya parlamentiniñ reisi Loretta Graujinene reberligi altında Litvaniya parlamenti binasında azırlandı.
Tedbir «İşğal etilgen Qırımda insan aqlarınıñ bozuluvı» halqara konferentsiyasından başlaycaq.
2016 senesi fevral ayında Avropa parlamenti Rusiye işğal etken Qırımda qırımlılar, hususan, qırımtatarlarnıñ aq-uquqlarınıñ bozulmasını takbih etip, bunıñnen bağlı rezolütsiyanı qabul etti. Dünya qırımtatar kongressiniñ eyyetleri Litvaniya reberligi ile körüşecekler. İdare şura toplaşuvında Qırım, Türkiye, Romaniya, Poloniya, Kanada, Amerika Qoşma Ştatlarından tahminen 70 teşkilât temsilcisi iştirak etecektir.
Qırımnıñ Rusiye akimiyeti yarımadada insan aqları bozulmağanını bildire. Qırımtatar resurs merkezi mart ayı devamında Qırımda aq ve serbestlik bozulmasını 68 kere qayd etti. Merkez Qırımda insan aqlarınıñ bozulması artqanını bildire. Fevral malümatına binaen, 40 bozuv qayd etilgen edi.
Tintüv, yaqalav, qorquzuv, çeşit türlü yasaqlar Qırımda adiy bir şeyge çevirildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
