Rusiye işğal etken Qırımda qırımtatarlarğa qarşı repressiyalar arta. Bunı qırımtatar halqınıñ milliy lideri Mustafa Cemilev bildirdi.
«Devleti, toprağı ve halqına sadıq qalğanlarğa qarşı repressiyalar quvetleşti ve çoqlaştı. Bugünki künde 13 semetdeşimiz apiste yata», – dep ayttı Cemilev Kyivde aprel 6-da keçirilgen matbuat konferentsiyasında, dep haber ete Qırım.Aqiqat mühbiri.
Mustafa Cemilev bildire ki, yarımadada tintüv ve yaqalavlar adiy şeyge çevirildi.
Onıñ aytqanına köre, eki yıl içinde 200 tintüv keçirildi. «Olarnıñ aman-man 95% qırımtatarlarnıñ evleri, mektepleri, camilerinde oldı», – dep qayd etti Mustafa Cemilev. Onıñ aytqanına köre, tintüv sebebi olaraq «silâ ya da yasaq etilgen edebiyat qıdırıla», dep bildirgen ediler.
Qırımtatarlarnıñ milliy lideri qayd ete ki, tintüvler Rusiye Federatsiyasınıñ qanunları bozulıp keçirile. «Bir de bir vesiqa, mahkeme ya da prokuraturanıñ qararı yoq. Sizde silâ ya da edebiyat bar kibi malümatımız bar aytalar», – dedi Mustafa Cemilev.
Halqara teşkilâtlar, şu cümleden Avropa parlamenti Rusiye işğal etken Qırımda insan aqları bozulğanını bildirip, Moskvanı bu cinayetlerni toqtatmağa çağırğan ediler. Rusiyege boysunğan Qırım akimiyeti bunı «abartılğan bir malümat» dep adlay.
Ukraina Baş prokuraturası 2016 senesi başından başlap Rusiye işğal etken Qırımda insan aqları ve azatlığınıñ bozulmasından sebep başlatılğan 60 cinaiy taqiqat aqqında bildire.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
