Avropa Şurasınıñ Parlament Assambleyası qırımtatar milliy Meclisiniñ ihtimal qapatılmasınen bağlı ciddiy raatsızlıq bildirmekte.
«Meclis qırımtatar halqını temsil etken ve aq-uquqlarnı musaviyleştirgen müim organdır. Rusiye Qırımnı işğal etkenine qarşı açıq muhalifet köstergenleri içün, olarnı qapatmaq ve ya ekstremistik teşkilâtı olaraq adlandırmaq aqılğa sığmağan bir şeydir», - dep ayttılar PACEniñ Ukraina boyunca maruzacıları Aksel Fişer (Almaniya) ve Jordi Şukla (İspaniya).
Avropa Şurasınıñ Parlament Assambleyasında bildirgenleri kibi, böyle vaziyet halqara standartlarğa zıt kelip, qırımtatar halqınıñ uquqlarını bozmaqta.
«Bu sebepten biz, Rusiye akimiyetini Meclisni yasaq etmesinden vazgeçmege çağıramız», - dep qoştılar şurada.
Maruzacılar aprel 28 ve 29 künleri Ukrainanı ziyaret etmek niyetindeler.
Rusiye nezareti astında bulunğan Qırım Yuqarı Makemesi Meclisniñ qapatılmasınen bağlı davanı muakeme etmege başladı. Mart 3 künü, birinci oturışta davacılar qırımtatarlarnı temsil etken organnıñ faaliyeti ekstremistik ve qanunsız olğanını isbatlağan işke qoşma olaraq daa vesiqalarnı qullanmağa talap etti. Qırım uquq qoruyıcı gruppası, Qırımda Meclisni qapatmağa bermemek ricası ile Halqara teşkilâtlarğa muracaat etti.
OON birleşken milletler teşkilâtı Rusiye Federatsiyasına Qırımdaki qırımtatar Meclisiniñ qapatılmasına izin bermemege çağırdı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
