Qırım yırcısı Jamala Nadejda Savçenkoğa açıq muracaat etip, oña qoltutqanını bildirdi. Yırcı ukrain uçucısına yollağan mektübini Facebook saifesinde derc etti.
«Sen – küçlü bir qadınsıñ, bütün dünya cesaretinden ayrette qala! Seni evde bekleymiz! Sağ qal! Sen bizge kereksiñ!», – dep yazdı Jamala.
Yırcı Savçenkonıñ oña yollağan qoltutuv ve hayırlav mektübi içün teşekkürlerini bildirdi.
Mart 6-da Nadejda Savçenkonıñ Facebook saifesinde (saifesini qız qardaşı Vera baqa) Ukrainanı temsil etecek qırımlı Jamalağa «Eurovision-2016» yır yarışında ğalebe qazanmaq tilegi ile açıq mektüp-muracaat qoyuldı.
«Susana Camaladinova – istidatlı qırımtatar ve ukrain yırcısı, Eurovisionda oña can-yürekten ğalebe qazanmasını tileyim!!! Jamala, öyle de devam et! Sen eñ yahşısıñ!» – dep muracaat ete öz mektübinde Nadejda.
Mektüpte Rusiye yırcısına qarşı tenqit sözleri de mevcut.
«Eurovision-2016» yır yarışında Jamala Stalin rejiminiñ qırımtatar halqına qarşı yapqan repressiyalarnı añlatqan «1944» yırınen çıqışta bulunacaq.
Ukraina vatandaşı, Ukraina halq deputatı Nadejda Savçenko bir yıldan berli Rusiyede apiste yata. Onı keçken sene yazda Ukraina akimiyetiniñ iznini almayıp Lugansk civarında bulunğan Rusiye televideniyesiniñ eki jurnalistini öldürmesi ile qabaatlaylar.
Savçenko ve adliyecileri bunı red etip, Rusiye jurnalistleri vefat etken vaqıtta onı endi separatistler esir alğanını, soñra ise zorlap Rusiyege yollağanlarını bildireler. Mart 3-te Nadejda Savçenko oña üküm çıqarılmasınıñ sozulmasına qarşı quru açlıq grevine başlağanını ilân etti.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
