Rusiye ve Qırımnıñ cemaat meclisiniñ azası, P. Hilendarskiy adına qurulğan Qırımdaki bulğarlar cumhuriyet cemiyetiniñ azası İvan Abajer mayıs 6 - 8 künleri Bulğaristanda ötkerilecek Qırım künleri aqqında tarif etti.
Bu aqta o, «Rossiya segodnâ» radiosınıñ yayınında bildirdi.
Onıñ sözlerine binaen, Qırımdaki rus akimiyetiniñ vekilleri yarımadadaki ayat aqqında tarif etecek, bunıñnen bir sırada tedbirge cemaatçılıq ta celp etilecek.
«Biz şimdi Qırım ve Bulğaristan şeherleriniñ qardaşlığını ğayrıdan tiklemege isteymiz. Yaqında Qırım akimiyeti Bulğaristanda Qırım künleri tedbirini keçirmege avale etti. Bizim ğayemizge köre, Qırım kününi tek akimiyetimiz degil de, cemaatçılıq ta temsil etmek kerek. Ögümizge qoyılğan maqsadlarğa esaslanıp, milliy, cemaat, iş diplomatlığınınıñ yardımı ile Bulğaristannen munasebetlerni azamiy eyileştirmege isteymiz. Yani tek akimiyet organlarımıznıñ yardımı ile degil. Bugünki künde Bulğaristan NATO ve Avropa Birligine kirgen bir devlet olmaqta. Şimdiki vaqıtta NATO bu yerde öz kiçkene bazalarını yerleştire. Bu ise eki ortodoks memleketlerniñ munasebetleri ceetten doğru degil», - dep ayttı Abajer.
Bunıñnen bir sırada, onıñ sözlerine binaen, Qırımda yaşağan faal bulğarlar yarımada boyunca hacılıq yürüşini teşkil etmege isteyler, o ise Makedoniya ve Sırbistan din adamları iştiragı ile olacaq.
Şimdiki vaqıtta hacılıq yürüşi boyunca resmiy malümat yoq.
Keçenleri Bulğaristan prezidenti Rosen Plevneliyev haber etkeni kibi, Bulğaristan Qırım işğalini iç bir vaqıt qabul etmez. Avropa Birligine kirgen devletlernen birlikte Rusiyege qarşı olğan sanktsiya siyasetine qol tutacaq edi.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
