Qırımtatar milliy Meclisi yolbaşçısınıñ birinci muavini Nariman Celâl bildirgeni kibi, Qırımdaki Voinka köyünde yaşağan yerli musulman cemiyet reisi Şaip Suleymanovnıñ evinde tintüv yekünlendi, politsiya hadimleri kitaplarnı tutıp aldı.
«Politsiya hadimleri bir çuval kitap tutıp aldı, añlaşılğanına köre, olar diniy yöneliştedir. Meraqlısı şu ki, yerli sakinlerniñ çoqusı, tintüv vaqıtına olarnı içeri alıp, şaatlıq etmege rica etkenler, amma buña qatiyen menfiy cevap aldılar, politsiya hadimleri añlatqanı kibi, yerli sakinler bu işte meraqlanğan şahıslardır. Şu sebeten olar öz şaatlarnı ketirdiler», - dep añlattı Celâl Qırım.Aqiqatqa
Qırım uquq qoruyıcı organlarda bu adisenen bağlı resmiy malümat yoq.
Mart 1 künü de Qırımnıñ Yedi Quyu rayonnıñ meclis reisine rus uquq qoruyıcılarnıñ tarafından «ziyaret» etildi.
Fevral 11 künü, Qırımda, qırımtatarlarnıñ evlerinde bir sıra tintüvler keçti. Olarnıñ neticesinde 12 insan tutıp qapatıldı, sorğudan soñ çoqusı azat etildi. Rusiye nezaret astında bulunğan Qırım prokuror Natalya Poklonskaya «Hizb ut - Tahrir» adlı terroristik teşkilâtınıñ faaliyetinen bağlı cinayi işniñ açılması aqqında bildirdi.
Fevral 12 künü qapatılğan dört insan Müslim Aliyev, Emir - Üsein Kuku, Enver Bekirov ve Vadim Siruknı Qırımdaki mahkeme apis etmek qarırını aldı. Fevral 29 künü keçirilgen nevbetteki makeme oturışında mezkür qarar deñişmedi.
Qırımtatar halqınıñ Meclisi böyle areketlerni qırımtatarlarğa qarşı yapılğan yañı repressiyalar kibi tanığan. Bundan sebep Ukraina tiş işler nazirligi fevral 12 künü narazlıqnı bildirip, Rusiyege basımnı küçleştirmege çağırdı.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
