Link açıqlığı

Salı künü, martnıñ 1-de, Kiyevdeki Halqara munasebetler institutında Qırımda apis etilgen qırımtatar meclisiniñ birinci muavini Ahtem Çiygozğa bağışlanğan açıq lektsiya ötkerilecek. Bu aqta Ukraina malümat seyasetiniñ nazir mesleatçısı Emine Ceppar bildirmekte.

«Aynı o Qırım tarafından Rusiyeniñ işğaline yapılğan qarşılıq timsali oldı. Etraf müitten ayırılğan kamera, işniñ 30 tomı, normal aşnıñ yerine pişken qapısta ve işğalciniñ başqa yalanları - aynı böyle şekilde qırımtatar liderlerniñ biri Ahtem Çiygoz apiste oturmaqta », – dep yazdı Ceppar.

Onıñ qaydlarına köre, Çiygoznıñ işi ve ayatı aqqında qırımtatarlarnıñ liderleri Mustafa Cemilev ve Refat Çubarov tarif etecekler.

Bunıñnen bir sırada tedbirde «Qırım – bu Ukraina» kampaniyasınıñ çerçivesinde «Qırım. Qarşılıq» adlı vesiqalı - bediy film kösterilecek.

Rusiyeniñ Qırım işğalinden soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.

Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.

Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG