«Fevral 26 işi» boyunca qabaatlanğan Qırımtatar Milliy Meclisiniñ reis muavini Ahtem Çiygoz Aqmescit apishanesinden semetdeşlerine mektüp yazdı. O, qırımtatar halqı Kremlge boysunğan Qırım akimiyeti istegeni kibi «folklor» bir millet olmaycağını qayd etti.
Çiygoznıñ mektübini fevral 25-te Qırımtatar Milliy Meclisi derc etti. Çiygoz mektübini qırımtatar erbabı Noman Çelebicihannıñ sözleri ile başladı: «Ant etkenmen, söz bergenmen millet içün ölmege». Soñra Çiygoz qırımtatarlarnıñ vatanğa avdet olması ve oña olğan sevgisi aqqında ayta.
«Biri bir qaç qoqla azatlıqqa ıntıluvımıznı ve irademizni yoq etecek, bizler «folklor» bir millet olacaqmız, bizni süslengen qoqla olaraq kösterip, amanlıq ve «bahtlı» ayat kösterip, bizim tarih, qaramanlarımız aqqında hatıramıznı unutacağımıznı tüşüne – iç bi vaqıt olmaycaq bir şey!», – dep aytıla mektüpte.
Çiygoz qayd etti ki, al-azırda Qırımda onıñ halqı ve yarımadanıñ diger sakinleri «mahsus alanğa» alındı.
«Menim halqım teslim olmaycaq! Bugün ukrain halqı birinci olıp bütün dünya bizge qoltuta!», – dep yazdı o.
Rusiyeniñ Qırım işğalinden soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
