Link açıqlığı

Lenur İslâmovğa qarşı çıqqanlar sebebini aytıp olamaylar – öz menfiy duyğularını onıñ Qırım Rusiye ükümetinde qısqa bir müddet devamında çalışqanınen isbatlay bileler. İslâmovğa ait Rusiyedeki «Cast-bank» müflis olğan kibi öşekler tasdıqlanmadı ve öşek olıp qala. Ukraina siyasetinde o, sentâbr ayında qırımtatar halqınıñ liderleri Mustafa Cemilev ve Refat Çubarovnıñ yanında peyda oldı. O vaqıt resmiy Kiyevniñ ardı-sıra ketmegen ve tişsiz olğan siyaseti qırımtatarlardan ğayrı, başqalarnı da açuvlandırmağa başladı.

Ukraina ükümeti Yuqarı Radanıñ Qırımnıñ eñ büyük tamır halqınıñ statusını pekitmek qararını yerine ketirmegen edi (ve alâ daa yerine ketirmey), aqılğa uymağan «Qırım» serbest iqtisadiyat alanı bar edi (ve alâ daa bar). Ukraina Tış işler nazirligi Keriç boğazındaki köpürniñ qurucılıq işleri başlağanına cevap bermegen edi. Er şey Qırım meselesinde bir de bir devlet siyaseti olmağanını köstere edi. Cemilev ve Çubarov akimiyet sistemasına bağlanıp, prezident, ükümet ve parlamentni yavaştan tenqit ete bile ediler. Vaziyetni deñiştirmek içün ukrain siyaseti ile bağlı olmağan bir insan kerek edi.

Böyle bir adam semeresiz akimiyet ile qavğa etip olamağan halq liderleri ve areket etmege istegen faallerge kerek

Boş yerni iş adamı Lenur İslâmov aldı. Qırımnıñ naqliyat qamaçavınıñ koordinatorı oldı. Böyle bir adam semeresiz akimiyet ile qavğa etip olamağan halq liderleri ve areket etmege istegen faallerge kerek. Hatırlatmaq kerek ki, qırımtatarlarnıñ liderleri Yanukoviç ve Putin ile qavğa etmekten qorqmadılar. Amma akimiyette olıp, aynı vaqıtta oña qarşı çıqmaq mümkün degil. Prezidentten Rusiye ile munasebetlerde ardı-sıra areket etmege rica etseñ, özüñ de ardı-sıra areket etmek kereksiñ.

Siyasetke kirişken siyasetçi olmağan biri er daim telüke altında, çünki belgilengen qaidelerni boza. Faqat akimiyet ile bağlı olmayıp, bir çoq imkânnı elde etken ola. İslâmovnıñ şahsiy reberligi altında Qırımnıñ naqliyat qamaçavı kerçekleştirilgen edi. Eki aydan soñ qamaçavnı Qırım ile ticariy munasebetlerni kesmek qararınen «qanunlaştırdılar». Bu bir ğalebedir.

Qırım meselesinde faal siyaset tarafdarlarınıñ daa bir zaferi «rus» Qırımını qaranlıqqa batırğan elektrik tiremeleriniñ patlatması oldı. Şimdige qadar buña ATR saibiniñ alâqası bar olğanını kimse (Rusiye teşviqatçılarından ğayrı) eminliknen aytıp olamay. O ve onıñ meslekdeşleri, akimiyetten farqlı şekilde yanaşaraq, patlav neticelerinden faydalanıp, elektrik energiyasınıñ berilmesine keder etmek içün nezaret noqtasını qurdılar. Lâkin bunıñ mesüliyetini İslâmov öz boynuna almadı, böylece qanun alanında areket etecegini kösterdi.

Energetik qamaçavı Qırım Rusiye akimiyeti içün ağır bir tepme oldı

Energetik qamaçavı Qırım Rusiye akimiyeti içün ağır bir tepme oldı. Amma Ukraina prezidentine yaqın iş adamlarınıñ menfaatlarına zarar ketirdi. Nazirler şurasındaki Poroşenkonıñ adamı olğan Energetika ve kömür sanayısı naziri Vladimir Demçişin Qırımğa elektrikler berilmeli, dep aytqan edi. Prezidentke yaqın olğan deputat İgor Kononenko energetik qamaçavınıñ Herson vilâyetiniñ sakinleri içün menfiy aqibetleri bar, dep bildirgen edi. Kiyevdeki akimiyet İslâmovnıñ areketleri onıñ menfaatlarına zıt kelgenini aytacaq ola. Bunı açıqtan bildirmey, çünki Rusiye ile cenkleşmeknen beraber ticaret yapmaq istegenini de kösterecek.

İslâmovnıñ sentâbr ayında söz bergeni kibi, Qırım qamaçavı Ukrainadaki yañı akimiyet içün bir sınav oldı. İslâmov Rusiyege ketemey – anda onı cinaiy taqip bekley. Demek ki, ATR ve diger kütleviy haber vastaları içün haber mevzularını tapıp, Ukrainada areket etecek. O, Qırım qamaçavınıñ nevbetteki basamaqları aqqında ayta. Onıñ yarımadanı deñizden etraftan ayırmaq vadeleri şaqa sebepleri oldı. Amma böyle bir qamaçav olsa, İslâmovnıñ iştiraki müim olmasa da, o, kerçek bir lider olıp, Rusiye akimiyetinden azat etilgen Qırımğa aqiqiy siyasetçi olıp qaytacaq.

Anvar Derkaç, jurnalist

«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün

XS
SM
MD
LG