Qırımtatar Milliy Meclisiniñ reisi Refat Çubarov ukrain ükümetini Qırımğa «iç olmağanda üç kün devamında» elektrik energiyasını bermemege çağırdı. Bunı Çubarov cuma künü, noyabr 6 künü, Meclis teşebbüsi ile Kiyevdeki Rusiye Federatsiyasınıñ elçihanesi yanında keçirilgen narazılıq aktsiyasında bildirdi.
Qırımtatar Milliy Meclisiniñ reisi aytqanı kibi, Qırım sakinleri «dayanmağa azırlar», yarımadada olğan generatorlar ise Qırımnı asğariy seviyede temin eterler, amma Rusiyeniñ arbiy bazalarını temin etemezler.
Refat Çubarov Rusiye prezidenti Vladimir Putinni Gitler ile qıyasladı.
«Bugünki Gitler, ambitsiyaları sıñırsız, olarnı yerine ketirmek içün bir çoq adamğa basqı yapa. Bizim toprağımız, Qırımımız işğal etildi. Yarımadamız kene de Moskva zorbalığına oğradı», – dedi Çubarov.
Qırım.Aqiqat mühbiri bildire ki, narazılıq aktsiyasınıñ iştirakçileri Kiyevdeki Rusiye elçihanesi yanında bir zıncır şeklinde turdılar. Olar betlerini kâğıtlar ile qapatalar, teşkilâtçılarnıñ aytqanına köre, böyle etip «Qırımda azatlığını qorçalamağa tırışqanlarğa qarşı yapılğan qorquzuv areketleri ifadelene».
Bazıları qollarında Rusiye Federatsiyasından siyasiy mabuslarnı azat etmek ve Qırımnıñ işğalden azat etilmesini Birleşken Milletler Teşkilâtınıñ kün tertibine kirsetmek talapları ile levhalar bar. Bunıñnen beraber, Qırımnıñ «vatandaşlıq qamaçavına» «ebet» demek çağıruvları ile levhalar bar.
Ukraina Milliy gvardiyasınıñ hadimleri narazılıq aktsiyasınıñ tertip-nizamını nezaret ete.
Ukraina prezidentiniñ qırımtatar halqı işlerinden vekâletlisi, qırımtatarlarnıñ milliy lideri Mustafa Cemilev cuma künü üyleden soñ Kiyevdeki Rusiye Federatsiyasınıñ elçihanesi yanında ötkerilecek barışıq narazılıq aktsiyasına kelmege çağırğan edi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
