Link açıqlığı

Cemilev Kiyevdeki Rusiye elçihanesiniñ yanında keçirilmesi planlaştırılğan narazılıq aktsiyasına kelmege çağıra


Ukraina prezidentiniñ qırımtatar halqı işlerinden vekâletlisi, qırımtatarlarnıñ milliy lideri Mustafa Cemilev cuma künü üyleden soñ Kiyevdeki Rusiye Federatsiyasınıñ elçihanesi yanında ötkerilecek barışıq narazılıq aktsiyasına kelmege çağıra.

Bunı onıñ matbuat hızmeti bildire.

«Qırımtatar Milliy Meclisiniñ Kiyevdeki temsilciligi, Qırım işğali ve Rusiye Federatsiyasınıñ ceza organları tarafından yapılğan basqı neticesinde yarımadanı terk etmege mecbur olğan Qırım sakinlerini birleştirgen cemaat teşkilâtları ve qırımtatar cemaat teşkilâtlarınıñ teşebbüsi ile keçirilgen barışıq narazılıq aktsiyasına vaqtınca işğal etilgen Qırımda yaşağan yurtdaşlarına lâqayt qalmağan Ukraina vatandaşları da davet etile», – dep aytıla ilânda.

Haberge binaen, aktsiyada «Qorqu yarımadası» adlı flash mob keçirilecek. Teşkilâtçılarnıñ zanınca, bu flash mob Qırımda öz serbestligini qorçalamağa tırışqanlarğa qarşı qorquzuv areketlerini ifadeley.

Barışıq aktsiyasınıñ şiarları: Qırımnı işğalden azat etüv – Birleşken Milletler Teşkilâtınıñ kün tertibine. Siyasiy mabus – esir Ahtem Çiygoz, Ali Asanov, Gennadiy Afanasyev, Rustem Vaitov, Mustafa Degermenci, Ruslan Zeytullayev, Yuriy İlçenko, Aleksandr Kölçenko, Aleksandr Kostenko, Nuri Primov, Nadejda Savçenko, Ferati Sayfullayeva, Oleg Sentsov, Aleksey Çirniyge azatlıq. Qırımnıñ vatandaşlıq qamaçavına – «Ebet».

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG