Olıp keçken yerli saylavlarnıñ esas alâmetleri saylayıcılarnıñ az sayıda iştirak etüvi ve akimiyetniñ belli bir derecede muvafaqiyeti oldı. Exit poll malümatına köre, «Petro Poroşenkonıñ bloku» ya da oña qoltutqan siyasiy leyhalar şeer ve vilâyet şuralarınıñ çoqusında temsilcilikni qazandı. Ekspertler qayd eteler ki, yerli saylavlarnıñ neticelerine köre, akimiyetniñ muhalifeti nevbetten tış parlament saylavları mevzusını kötermeycek.
«Opora» ağınıñ malümatına köre, Ukrainada saylayıcılarnıñ aman-aman 47% yerli idare organlarına temsilcilerini saylmağa keldi. Rey berüvde qayd etilgen bozuvlar çoq olmağanını aytalar.
Bozuvlarnıñ milliy köstergiçleri çoq degil. Soñki parlament saylavlarından bile azOlga Ayvazovskaya
«Bozuvlarnıñ milliy köstergiçleri çoq degil. Soñki parlament saylavlarından bile az», – dep ayta «Opora» ağınıñ koordinatorı Olga Ayvazovskaya.
Siyasiy ekspertler ve akimiyet muhalifetiniñ aytqanına köre, saylav qanunı tolu degil, saylayıcılar ise akimiyetke inanmaylar.
Yañı bir şey yoq; eskisi ise çalışmağa devam eteAndrey Yermolayev
«Adamlar is eteler: bir şey deñişmedi! Çünki saylavlardaki cedvellerde aynı memur ve deputatlarnı köreler... Yañı bir şey yoq; eskisi ise çalışmağa devam ete», – dep ayta siyasetşınas Andrey Yermolayev.
Saylayıcılarnıñ az sayısı parlamentniñ ğayrıdan saylanmasına qarşı
Exit poll malümatına köre, «Petro Poroşenkonıñ bloku» ya da akimiyetke qoltutqan siyasiy leyhalar – misal olaraq, «Naş kray» – şeer ve vilâyet şuralarınıñ ekseriyetinde temsilcilikni qazandı. Umumen alğanda yerli saylavlar «Batkivşçina» ve «Samopomiç» içün de muvafaqiyetli keçti.
Akimiyet içün bu saylavlar ğayet muvafaqiyetli oldı, onıñ muhalifeti de pek farqlıYevgeniy Magda
«Akimiyet içün bu saylavlar ğayet muvafaqiyetli oldı, onıñ muhalifeti de pek farqlı. Olarnıñ ğayretleri birleştirilmez, olar pek farqlılar. «Batkivşçina», «Oppozitsionnıy blok» ve «Ukrop» bir olacağını tasavvur etip olamayım», – dep ayta siyasiy ekspert Yevgeniy Magda.
Ğarbiy vilâyetlerde «Svoboda», şarqiy vilâyetlerde ise «Oppozitsionnıy blok» yahşı neticeler kösterdiler. Harkov ve Dnepropetrovsk vilâyetlerinde Dnepropetrovsk vilâyetiniñ devlet memuriyetiniñ sabıq reisi İgor Kolomoyskiy ile bağlı siyasiy leyhalar – «Ukrop» ve «Vozrojdeniye» küçleriniñ – neticeleri güzel.
Yevgeniy Magdanıñ fikirince, yerli saylavlarnıñ ilk neticeleri köstere ki, akimiyetniñ muhalifeti nevbetten tış parlament saylavları mevzusını kötermeycek. Onıñ aytqanına köre, «saylavlarda az sayıda iştirak etüv bunı daa bir kere isbatlay».
Şeer yolbaşçılıqlarında beklenmegen şeyler
Vilâyet merkezleriniñ ekseriyetinde şeer yolbaşçılarınıñ saylavları eki basamaqtan ibaret olacaq. Yekâne istisna Harkov oldı, mında «Vozrojdeniye» firqasından şeerniñ şimdiki yolbaşçısı Gennadiy Kernes birinci basamaqta ğalebe qazandı.
Kiyevni aytacaq olsaq, ekinci basamaqqa şeer yolbaşçısı Vitaliy Kliçko ile kim çıqacaq daa belli degil. Exit poll malümatına köre, birden dört namzet – Vladimir Bondarenko, Borislav Bereza, Sergey Gusovskiy ve Aleksandr Omelçenkoğa qoltutqan insanlarnıñ sayısı aman-aman aynı. Siyasiy ekspertlerniñ bildirgenine köre, reyler sayılğanda problem çıqa bile. Siyasiy tehnolog Taras Berezovetsniñ qayd etkenine köre, şeerniñ şimdiki yolbaşçısı içün uyğun olğan raqipni ekinci basamaqqa çıqara bileler.
Dnepropetrovsk şeerinde «Ukrop» namzeti Boris Filatov ve «Oppozitsionnıy blok» namzeti Aleksandr Vilkul ekinci basamaqqa çıqtılar. Reylerniñ sayısı aman-aman aynı, olarnıñ arasında küreş kergin olacaqtır, bu sebepten ekinci basamaq neticelerini tahmin etmek de zor. Halq deputatı İgor Popovnıñ aytqanına köre, «Poroşenkonıñ taqımı gizli-gizli Vilkulğa ümüt etken edi».
Odessada şeerniñ şimdiki yolbaşçısı Gennadiy Truhanov ve akimiyet qoltutuvını körgen Saşa Borovik ekinci basamaqqa çıqtılar. Lvivde keçirilecek ekinci basamaqta şeerniñ şimdiki yolbaşçısı, «Samopomiç» lideri Andriy Sadovıy ve «Svoboda» vekili, sabıq spiker muavini Ruslan Koşulinskiy raqip olacaqlar.
«Sadovıy birinci basamaqta ğalebe qazanamadı, onıñ içün kederli bir işarettir. Mında akimiyet maqsadına irişti: o, özüni Lvivniñ saibi olaraq kösteremedi», – dep qayd ete Yevgeniy Magda.
Merkeziy saylav komissiyası şeer yolbaşçıları saylavlarınıñ ekinci basamağını noyabr 15-te keçirmege planlaştıra.
Metnniñ asıl nushası – Radio Svoboda saytında
