Qırım Muhtar Cumhuriyetiniñ kurort ve turizm sabıq naziri Aleksandr Liyevniñ fikirince, 2014 senesinden soñ qırımlılar Ukraina mustaqillik Kününiñ tam manasını ilk sefer añladılar.
Bunı o Qırım.Aqiqatnıñ mahsus leyhası - «Qıtadan hayırlavlar» - çerçivesinde qayd etilgen video muracaatında ayttı.
«Belki de, ilk sefer bizler bu bayram ne olğanını tolusınen ve yürekten añladıq. Eminim, Qırım toprağımız Ukrainağa keri qaytarılğan soñ bu bayram eñ yüksek seviyede, bizler, qırımlılar, bilgeni kibi qayd etilecek. Eminim, bizim içün, qırımlılar içün, Putinniñ soñki hızmetçisi toprağımıznı terk etecek künü eñ müim bayram olacaq», – dedi Liyev.
O, yarımada sakinlerine Qırımnıñ Ukrainağa keri qaytarılmasınıñ künü tezce kelmesini tiledi.
Ukrain bayramı munasebetinen Qırım.Aqiqat mahsus leyhağa başlay – «Qıtadan hayırlavlar». Kün devamında Qırım.Aqiqat siyasetçi, memur, siyasetşınas ve jurnalistlerniñ yarımadada yaşağan qırımlılar içün qayd etken video muracaatlarını aydınlatacaq. Qırımtatarlarnıñ milliy lideri Mustafa Cemilevniñ muracaatı endi aydınlatıldı. O, qırımlılarnı Taras Şevçenkonıñ eserinden sözler ile hayırlap, Rusiyeniñ qorquları aqqında tarif etti. Ukrainanıñ Avropa insan aqları mahkemesi işlerinden ükümet vekâletlisi, qırımlı Boris Babin yarımada sakinlerine Qırımnıñ azat etilmesini tiledi.
