Ukraina prezidentiniñ qırımtatar halqı işlerinden vekâletlisi Mustafa Cemilev Poloniyada elde etken «Birdemlik mukâfatından» 100 biñ euronı Kök yüzü qaramanlarınıñ soy-soplarına ayırdı.
«Bu yalıñız para, lâkin böylece Ukrainanı azat etmege yardım etip canını feda etken vatanperverlerniñ qorantaları ve soy-soplarına minnetdarlığımıznı bildirecek olamız. Bu adamlarnı ve olarnıñ yapqanlarını er daim aqılmızda tutacaqmız. Olarnıñ sayesinde şimdi serbest demokratik memlekette yaşaymız. Bunı unutmamaq kerek», – dedi Cemilev iyül 21-de Kiyevdeki brifingde.
Onıñ aytqanına köre, mukâfat şartları gumanitar programmalarnı köz ögüne almay, bu sebepten Maydanda elâk olğanlarnıñ ailelerine bu paranı bermek içün o Halqara Birdemlik Fondunıñ reisine muracaatta bulundı.
Kök yüzü qaramanlarınıñ soy-sopları Cemilevge Qırımnıñ Ukrainağa keri qaytarılmasını tilep, «ukrain ve qırımtatar halqlarınıñ bir qoranta olıp yaşamalarını» istediler
«Halqara Birdemlik Fondunıñ prezidenti Kşiştof Stanovskige muracaat etip, elâk olğan Kök yüzü qaramanlarınıñ qorantalarına paranıñ bir qısmını bermege istegenimni añlattım. Maña qoltutqanı ve añlağanı içün minnetdarım», – dep qayd etti Cemilev.
Kök yüzü qaramanlarınıñ soy-sopları brifingge elâk olğan tuvğanlarınıñ fotosüretleri ile kelip, qırımtatarlarnıñ milliy liderine köstergen maddiy yardımı içün teşekkürler bildirdiler. Olar Cemilevge Qırımnıñ Ukrainağa keri qaytarılmasını tilep, «ukrain ve qırımtatar halqlarınıñ bir qoranta olıp yaşamalarını» istediler.
2014 senesi iyün 3-te Mustafa Cemilev Poloniyada uquq qorçalayıcı faaliyet içün 1 million eurolıq «Birdemlik mukâfatını» aldı. Mukâfat şartlarına köre – 250 biñ euro nominantnıñ özü ala, 750 biñ euro ise memleketteki demokratiya inkişafı programmalarına sarf etile. Mukâfat berilgende AQŞ prezident Barack Obama Varşavağa kelgen edi.
2014 senesi fevral ayında Kiyevniñ merkezinde numayışçılar ve uquq qoruyıcılar arasında yüz bergen çatışmalar neticesinde yüzden ziyade kişi elâk oldı, yüzlernen adam yaralandı. Adamlarnıñ çoqusı nişancılarnıñ qurşunlarından can berdi. Narazılıq aktsiyalarında elâk olğan faallerni Kök yüzü dep adladılar.
