Kiyev – İyül 20-de ATR Zaman haberler yayınına yañıdan başladı. Bu künge qadar qırımtatar telekanalınıñ soñki haberler yayını mart ayında çıqqan edi. Qırım.Aqiqat mühbiri ATRniñ yañı Kiyev ofisini ziyaret etip, jurnalistlerniñ ukrain paytahtında azırlağan ilk haberler yayınını seyir etti.
– Pencerelerni qapatayıq, men konditsionerni açayım, – dep teklif etti ATR hadimi işdeşlerine.
Telekanalnıñ haberler odasında pek sıcaq. Küçük bir odada onğa yaqın insan çalışa. Er kesniñ işi bar: 5 saatten soñ Zaman haber yayını efirge çıqmaq kerek. Haberler odasınıñ divarında eki televizor asılğan: biri ATRni, ekincisi Lâle qırımtatar bala telekanalını köstere.
– Biri-biri artından Oraza bayram levhaları kete. Olarnıñ arasına bir şey qoşsaq, olurmı? – dep soray işdeşlerinden Safiye Ablâyeva. Qırımda o telekanalnıñ jurnalistlerinden biri edi, şimdi ise haberlerniñ alıp barıcısı olıp çalışacaq.
– Mence, böyle qaldırmaq kerek, – cevap bere jurnalist Şevket Namatullayev. O, küle ve güzel keyfini gizlemey, işdeşleriniñ çoqusı ise işke dalıp duyğularını köstermey.
ATR Qırım muarririyeti – yoq
Telekanalnıñ ofisi Kiyevdeki Sırets metro stantsiyasınıñ yaqında yerleşken ofis binalarından birinde yerleşmekte. Ekinci qatta ATR eki zalnı ala: haberler odası ve kanal reberligi yerleşken oda. Mında haber yayınlarınıñ baş muarriri Osman Paşayev de çalışa. Onıñ aytqanına köre, hadimler çoq degil, haberler üzerinde iş ise büyük ğayretni talap ete.
– Haberler – bir sıra küçük şekil, şu cümleden televideniyede. Skype qaydını azırlamaq ve onı üç tilge tercime etmek içün – bir sıra vaqıt kerek. Haberler üç tilde çıqa: rusça, qırımtatarca ve ukraince. Tercimeler bayağı vaqıt ala , – dep añlattı Osman.
ATR telekanalı aprel 1-de Qırımda işini toqtattı. Medianıñ reberligi soñuna qadar yarımadada çalışmağa tırıştı, Rusiye litsenziyasını almaq içün dört kere vesiqalarnı bergen edi, lâkin Roskomnadzor vesiqalarda hata bar dep, onı öyle de bermedi.
«ATR Group» mediaholdinginiñ saibi Lenur İslâmov iyün 17-de bildirdi ki, telekanal Ukraina litsenziyası boyunca Kiyevden yayın yapacaq. Onıñ aytqanına köre, ATR ve Lâle bala telekanalını uydu vastasınen, em de internetten seyir etmek mümkün olacaq. İyün ortalarında İslâmov qayd etti ki, Qırım muarririyetiniñ qıtaiy Ukrainada azırlanacaq yayınlarğa alâqası olmaycaq. Osman Paşayevniñ qayd etkenine köre, yañı haberler yayını Qırım muarririyetiniñ iştiraki olmadan azırlana.
– Andan malümat almaq qıyın. ATR Qırımda muarririyet olaraq yoq, dep ayta bilemiz. Bizler Qırımda bulunğan serbest jurnalistlerden haber almağa tırışacaqmız, böyle etip Qırımdan levha alacaqmız, – dep añlattı Paşayev.
«Tırışacaqmız»
Zamannıñ Kiyev studiyası seyirciler alışqan studiyadan pek farq etmey. Eskisi kibi qırmızı-qara tüslerde yapılğan, alıp barıcınıñ artında ise – dünya haritası. Bu zaldan tezden efirge çıqacaq Safiye Ablâyeva bir qaç daqqa ayırıp, Zaman deñişmeleri aqqında tarif etmege razı ola.
– ATR – birinci qırımtatar telekanalı. Mence, telekanalnıñ auditoriyası eskiden olğanı kibi Qırım qalacaq. Bizler tırışacaqmız, yapıp olurmızmı-yoqmı – vaqıt kösterir, – dep ayta Safiye.
Jurnalist Şevket Namatullayev işdeşiniñ aytqanlarına bir-eki söz qoşacaq ola. Onıñ aytqanına köre, Qırımdan haber yapmaq pek zor, çünki ATR ile iş tutqan qırımlılar telüke altında qala.
– Evlerine ya da çalışqan yerlerine kele bileler. Adamlarnı yalvaramız. Lâkin bizge malümat bermege azır olğan insanlar bar. Birisi cep telefonına, ekincisi küçük kameralarğa çıqara, – dep sırlarını aça Şevket.
Onıñ aytqanına köre, Zaman iş künleri künde dört kere efirge çıqacaq. Qırım haberlerinden ğayrı, Zamanda qıtaiy Ukrainada yaşağan qırımtatarlar aqqında levhalar olacaq. Jurnalistler umummilliy ve dünya haberlerine de diqqat ayırmağa planlaştıralar.
