Link açıqlığı

Ukraina prezidenti Türkiyede keçirilmesi planlaştırılğan Bütündünya qırımtatar kongressine davet etildi


Ukraina prezidenti Petro Poroşenko

Kiyevde cuma künü, iyül 3-te, Ukraina prezidenti Petro Poroşenko qırımtatarlarnıñ lideri, Ukraina prezidentiniñ qırımtatar halqı işlerinden vekâletlisi Mustafa Cemilev ve Qırımtatar Milliy Meclisiniñ reisi Refat Çubarov ile körüşti, – dep haber ete Qırım.Aqiqat.

Qırımtatar Milliy Meclisiniñ reisi Refat Çubarov Facebook saifesinde bildirgeni kibi, Ukraina prezidenti Petro Poroşenko avgust 1-3 künleri Ankarada keçirilecek II Bütündünya qırımtatar kongressine resmiy şekilde davet etildi.

Petro Poroşenko, Mustafa Cemilev ve Refat Çubarov qırımtatarlarnıñ vaziyeti ve işğal etilgen Qırımda insan aqları ile bağlı meselelerni muzakere ettiler

Körüşüvde Petro Poroşenko, Mustafa Cemilev ve Refat Çubarov qırımtatarlarnıñ vaziyeti ve işğal etilgen Qırımda insan aqları ile bağlı meseleler, qıtaiy Ukrainanıñ Qırım ile alâqaları, em de Ukrainada qırımtatar matbuat vastalarınıñ inkişafı kibi meselelerni muzakere ettiler.

«Mustafa Cemilev Ukrainanıñ tış siyasetinde Qırım yönelişi mevzusında bir sıra meselelerde ayrıca toqtaldı», – dep aytıla haberde.

Refat Çubarov prezidentni qırımtatar halqınıñ aq-uquqlarınıñ ğayrıdan tiklenmesi ile bağlı qanun leyhalarınıñ azırlıq ketişatınen tanış etti.

Bildirilgeni kibi, bütün bu meseleler boyunca Ukraina prezidenti zaruriy emirler berdi.

XS
SM
MD
LG