Link açıqlığı

Saatnıñ esas haberi

Nariman Celâl: Qırım mahkemesi Meclis reisi muavininiñ apis cezasını arttırmaq niyetinde


Ahtem Çiygoz
Ahtem Çiygoz

Cuma künü, mayıs 15-te, saat 11:00 Aqmescitniñ Kiyev rayon mahkemesinde taqiqatçınıñ keçken sene fevral 26-da «kütleviy numayışlarnı teşkil etmesinde» qabaatlanğan Qırımtatar Milliy Meclisi reisiniñ muavini Ahtem Çiygoznıñ apis cezasını arttırmaq muracaatı baqılacaq.

Bunı Qırımtatar Milliy Meclisi reisiniñ birinci muavini Nariman Celâl bildire.

Onıñ hatırlatqanına köre, aynı mahkemeniñ qararı ile Çiygoz 2015 senesi mayıs 19-ğa qadar Aqmescit SİZOsında apiste buluna.

«Adliyeciniñ aytqanına köre, o, Ahtem Çiygoznıñ cezası deñiştirilsin dep, elinden kelgenini yapacaq, çünki onıñ içün kefil olmağa azır olğan insanlar da bar. Şahsen men mahkeme Çiygoznıñ apis cezasını arttıracağını tüşünem, çünki taqiqat Ahtem Çiygoznıñ qabaatını isbatlağan «delillerni» ve «şaatlarnı» tapmağa yetiştirmedi», – dep yazdı Celâl Facebookta.

Onıñ malümatına köre, sorğuğa çekilgen Meclis azaları, yaqalanğan ve apiske alınğanlarnıñ çoqusı 2014 senesi fevral 26-da Çiygoz «Qırım parlamentiniñ yanında olğan numayışlarnıñ teşkilâtçısı olmağanını, aksine, adamlarnı tınçlandırmağa tırışqanını» bildirdi.

Çiygoznı 2015 senesi yanvar ayında 2014 senesi fevral 26 künü «kütleviy çatışmalarnıñ teşkil etilmesi ve iştirak etmesinde» şeklep, taqiqat çerçivesinde yaqaladılar. Çiygoznı 2015 senesi fevral 19-ğa qadar apiske aldılar, soñra da bu müddetni mayıs 19-ğa qadar arttırdılar.

Çarşenbe künü, mayıs 6-da, Qırımtatar Milliy Meclisi reisiniñ birinci muavini Nariman Celâl bildirdi ki, Qırımda Aqmescit SİZOsında bulunğan Qırımtatar Milliy Meclisi reisiniñ muavini Ahtem Çiygoznı kartserge attılar.

Mecliste deyler ki, böyleliknen Çiygozğa basqı etip, kerek olğan şaatlıqnı elde etmege isteyler.

Mayıs 8-de Çiygoznı kartserden adiy kamerağa qaytardılar, o, ilân etilgen açlıqnı toqtattı.

Ahtem Çiygoznı Rusiye uquq qorçalayıcısı, Rusiye Federatsiyasınıñ prezidenti yanındaki vatandaş cemiyetiniñ inkişafı ve insan aqları boyunca Şurasınıñ azası Andrey Yurovnıñ şahsiy kefaleti ile azat etmediler.

XS
SM
MD
LG