Link açıqlığı

Saatnıñ esas haberi

Aqmescit SİZOsında bulunğan Qırımtatar Milliy Meclisi reisiniñ muavini Ahtem Çiygoznı Rusiye uquq qorçalayıcısı, Rusiye Federatsiyasınıñ prezidenti yanındaki vatandaş cemiyetiniñ inkişafı ve insan aqları boyunca Şurasınıñ azası Andrey Yurovnıñ şahsiy kefaleti ile azat etmediler.

Bunı Qırımtatar Milliy Meclisiniñ matbuat hızmeti Çiygoznıñ adliyecisi bergen malümatına esaslanıp bildire.

«Qırım Cumhuriyetinde Rusiye Taqiqat komitetiniñ Baş taqiqat idaresi ve Aqmescitniñ Kiyev rayon mahkemesine Ukraina ve Tataristan Cumhuriyetinde nam qazanğan sanat erbabı, «Qırım» ansambliniñ bediiy reberi Server Kakura, em de «Qırım» gazetasınıñ baş muarriri, filologiya ilimleri namzeti, Qırım müendislik pedagogika universitetiniñ qırımtatar ve türk filologiyası fakultetiniñ dekan vazifelerini eda etken Bekir Mamutovnıñ Ahtem Çiygoz içün kefil olmaq arizaları berildi», – dep bildire Meclis.

Rusiye Cinaiy protsessual kodeksine binaen, şahsiy kefalet yazma şeklinde berile, kefil şeklengen ya da qabaatlanğan kişi içün mesüliyetni taşıy, bu şahısnıñ taqiqat ya da mahkeme izni olmasa, yaşağan yerini terk etmemesini ve bütün sorğularğa kelmesini kefil ete.

Çiygoznı 2015 senesi yanvar ayında 2014 senesi fevral 26 künü «kütleviy çatışmalarnıñ teşkil etilmesi ve iştirak etmesinde» şeklep, taqiqat çerçivesinde yaqaladılar. Çiygoznı 2015 senesi fevral 19-ğa qadar apiske aldılar, soñra da bu müddetni mayıs 19-ğa qadar arttırdılar.

Çarşenbe künü, mayıs 6-da, Qırımtatar Milliy Meclisi reisiniñ birinci muavini Nariman Celâl bildirdi ki, Qırımda Aqmescit SİZOsında bulunğan Qırımtatar Milliy Meclisi reisiniñ muavini Ahtem Çiygoznı kartserge attılar.

Mecliste deyler ki, böyleliknen Çiygozğa basqı etip, kerek olğan şaatlıqnı elde etmege isteyler.

Mayıs 8-de Çiygoznı kartserden adiy kamerağa qaytardılar, o, ilân etilgen açlıqnı toqtattı.

XS
SM
MD
LG