Qırım Devlet Şurası başı Vladimir Konstantinov Qırımtatar Milliy Meclisiniñ yolbaşçılığını 2014 senesi fevral 26 künü Qırım parlamenti yanında keçirilgen muqavemet-mitingde yüz bergen eki insannıñ ölüminde qabaatlay. Konstantinovnıñ fikrine köre, Meclis işbu vaqialarnıñ teşebbüsçisi olıp, cezasını körmeli.
Bunı o, bıltır fevral 26 künü keçken vaqialarğa bağışlanğan hatıra tahtasınıñ açılış tedbiri vaqtında bildirdi.
«Parlamentniñ binası yanında keçken ziddiyet Qırım cemiyeti içün adetiy bir al degil edi. Qırım akimiyetini qanunsız ete bilecek mahsus tehnologiya ve kütleviy tarikke yol bermek içün bir ıntıluv edi. Akimiyetni mecburiy sürette devirmek – icracılarnıñ esas maqsadı edi», – dedi o.
Konstantinov emindir ki, parlamentniñ yanında narazılıq numayışına çıqqan qırımtatarlar öz semetdeşleri arasında keñ destek saibi degil ediler.
«Bu qanunsız areketniñ başında Çubarov edi. Siyasetçilerniñ tar bir taqımınıñ öz siyasiy meselelerini çezmek içün ıntıluvı edi. Belki de, vazifelerniñ elde etilmesi içün. Çünki o vaqıtta Meclisniñ ğayesi müflis olğanı endi belli edi. İnsanlarğa artıq yañı bir şey berip olamaz edi. Rus dünyasına qarşılığı ve muhalif mevamınıñ neticeleri artıq yoq edi», – dedi Qırım spikeri.
«Fikrimce: e, şu insanlar cezasını körmeli. O «tarik»niñ sayesinde islâ olmaz bir şey yüz berdi – adiy qırımlılar elâk oldı», – dedi o.
Hatırlatamız, Rusiye Taqiqat komiteti yanvar 29-da yaqalanğan Qırımtatar Milliy Meclis reisiniñ muavini Ahtem Çiygozğa nisbetten «kütleviy nizamsızlıqınñ teşkil etüvi» maddesi boyunca cinaiy iş açtı.
2014 senesi fevral 26-da Qırım parlamenti yanında Qırımnıñ Ukrainadan ayırılmasına qarşı çıqqanlarnıñ ve bunıñ tarafdarları olğanlarnıñ büyük mitingi olıp keçken edi. Birinciler saflarında qırımtatarlar, Meclis vekilleri ve Ukrainağa qoltutqan faaller bar edi, olarğa qarşı Sergey Aksenov yolbaşçılıgında «Russkoye yedinstvo» teşkil etken Rusiyege qoltutqan faaller çıqtılar.
Ertesi künü Qırımnıñ memuriy binaları «yeşil adamçıqlar» tarafından zapt etilgen edi, mart 16-da ise «referendum» ötkerildi.
Onıñ neticesinde Rusiye Qırımnı öz terkibine aldı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
