Link açıqlığı

Qırım akimiyeti yarımadada «Qırım baari» adını alğan keçken seneniñ fevral 26-da olıp keçken vaqialarınıñ hatıra tahtasını tantanalı sürette açtı.

Qırım.Aqiqat mühbiri bildire ki, hatıra tahtası Qırım Devlet şurası binasına asıldı.

Tedbirde spiker Vladimir Konstantinovnıñ yolbaşçılığında Qırım parlamentiniñ reberligi, em de ükümet vekilleri bulundı. Hatıra tahtasınıñ açılış tedbirinde Qırım yolbaşçısı Sergey Aksenov kelmedi.

«2014 senesi fevral 26-da Qırım Cumhuriyetiniñ Devlet şurası binasınıñ yanında Qırımnıñ Rusiye Federatsiyası terkibine tarihiy qaytmasınıñ ilk adımları atılğan edi», – yazıla hatıra tahtasında.

«Bu qarşılıq künü, oña deñiştirüv vaqiası dep aytmaq mümkün. Aynı bu künde bizler, Ukrainadaki devlet avdarmasına qarşılıq kösterip, Qırımnıñ taqdiri içün mesülietni boynumızğa aldıq», – dep ayttı Konstantinov 2014 senesiniñ fevral vaqiatlarını izaatlap.

2014 senesi fevral 26-da Qırım parlamenti yanında Qırımnıñ Ukrainadan ayırılmasına qarşı çıqqanlarnıñ ve bunıñ tarafdarları olğanlarnıñ büyük mitingi olıp keçken edi. Birinciler saflarında qırımtatarlar, Meclis vekilleri ve Ukrainağa qoltutqan faaller bar edi, olarğa qarşı Sergey Aksenov yolbaşçılıgında «Russkoye yedinstvo» teşkil etken Rusiyege qoltutqan faaller çıqtılar.

Ertesi künü Qırımnıñ memuriy binaları «yeşil adamçıqlar» tarafından zapt etilgen edi, mart 16-da ise «referendum» ötkerildi.

Onıñ neticesinde Rusiye Qırımnı öz terkibine aldı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG