Rusiye prezidenti Vladimir Putin dey ki, Moskva ve Kiyev arasında cenk olması imkânsızdır.
«Mence, bunıñ kibi felâketniñ olması imkânsız, ve ümüt etem ki, böyle bir şey olmaycaq. Belli bir topraqlarnıñ qaytarılmasını aytsaq, bu revanşizm alâmetleridir. Ve bir de bir topraqlarnıñ bir yerge qaytaralması degil. Men tevsiyeler bermege istemeyim, lâkin Ukraina kibi büyük bir avropalı memleketniñ reberligi eñ evelâ memleketni adiy yaşayışqa qaytarmalı. İqtisadiyat, içtimaiy saanı eyiliştirmek, memleketniñ cenüp-şarqı ile munasebetlerni medeniy usullar ile eyiliştirmek kerek», – dep ayttı Putin bazarertesi künü, fevral 23-te, Rossiya 1 telekanalına bergen intervyüsında.
Qırım işğali yıllığında Ukraina prezidenti Petro Poroşenko ukrain devleti Rusiye tarafından işğal etilgen yarımadanı qaytarmağa devam etecegini bildirdi. Onıñ qayd etkenine köre, «Ukraina devleti ve Qırımda insan aqqlarına qarşı cinayet yapqan er bir insan halqara ve ukrain mahkemelerinde olacaq».
2014 senesi mart 16 künü Rusiyeniñ arbiy ve siyasiy yardımı ile Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Ukraina ve Ğarp Rusiyeni Donbasstaki separatistlerge kösterilgen yardımda qabaatlaylar. Moskva bunı red ete. Rusiyeniñ qayd etkenine köre, Donbassta Rusiyeniñ «göñüllileri» ola bile.
Ğarp Rusiyege qarşı bir sıra ceza kirsetti.
Fevral 12-de Ukraina, Frenkistan, Almaniya ve Rusiye liderleri Donbassta fevral 15-ten itibaren ateş toqtatılması aqqında añlaştılar. Ukraina askerleri ve Rusiyege qoltutqan separatistler bir-birini ateş kesüv rejiminiñ bozulmasında qabaatlaylar.
