Link açıqlığı

Qırım şimalinde «Rusiye sıñırı»ndan keçken qırımtatar uquq qorçalayıcıları yaqalandı (yañartıla)


Sinaver Kadırov, Eskender Bariyev ve Abmecit Suleymanov (soldan-sağğa) Aqmescitte matbuat konferentsiyasında

Cuma künü, yanvar 23-de, gece maalde, Qırımtatar halqınıñ aq-uqularını qorçalav komitetiniñ koordinatorları Eskender Bariyev, Abmecit Suleymanov (ekisi de Meclis azası ola) ve Sinaver Kadırov Çonğar «Rusiye sıñırında» uquq qoruyıcı organlarınıñ hadimleri tarafından yaqalandılar. Bunı Qırım.Aqiqat saytına Komitet temsilcileriniñ safdaşlarından biri bildirdi.

Subetdeşniñ malümatına köre, Rusiye sıñır bekçileri Bariyev, Suleymanov ve Kadırovğa «sıñırdan» qıtaiy Ukrainağa keçmege izin bermediler.

Komitet temsilcileriniñ yaqalav sebepleri şimdilik belgisizdir

«Bunıñ yerinde olarnı bir vagonğa qapattılar, sıñır nezaret vekilleri ile qavğa yüz berdi, bundan soñ olarğa maşinağa qaytmağa musaade ettiler, faqıt maşina anahtarını tutıp aldılar. Şimdi qırımtatar faalleri maşinada oturıp, iza subetini keçirecek uquq qoruyıcı organlarınıñ hadimini bekleyler», – tarif etti subetdeş.

Qırım.Aqiqat haber etkeni kibi, cumaaqşamı, yanvar 22-de, evelleri Sinaver Kadırov yaşağan daire qapılarına belgisiz şahıslar keldi.

Bildirilgeni kibi, keçken cumaertesi künü sport qıyafetinde belgisiz şahıslar Qırımtatar halqınıñ aq-uquqlarını qorçalav komitetiniñ konferentsiyasına keder etecek oldılar.

Bıltır, dekabr ayında, belgisiz şahıs İnsan aqları Künü munasebeti ile keçirilgen matbuat konferentsiyasında Bariyev, Suleymanov ve Kadırovğa zelönka septirgen edi.

Qırım çıqışında yaqalanğan Meclis azalarını para cezası ve sürgünlik bekley

Yanvar 23-ne keçer gecesi yarımada çıqışında Rusiye sıñır bekçileri tarafından yaqalanğan qırımtatar uquq qoruyıcıları ve Meclis azalarını Rusiye Federatsiyasında bulunuv tarzınıñ bozuluvında qabaatlaylar.

Bunı Qırım.Aqiqat saytına Meclis azası, Qırımtatar halqınıñ aq-uquqlarını qorçalav komitetiniñ reisi Eskender Bariyevniñ qadını Zarema bildirip, onıñ ömür arqadaşı diger yaqalanğanlar ile Ermeni Bazarnıñ kiriş noqtasından keçmege areket etkenini tasdiqladı.

Rusiye mahsus hızmetleriniñ hadimleri yaqalanğanlarnı birer-birer çağırıp, olar, çetel vatandaşları olıp, Rusiye Federatsiyasınıñ toprağı olğan Qırımda bulunuv tarzını bozğanı aqqında haber eteler

Onıñ haber etkeni kibi, Rusiye mahsus hızmetleriniñ hadimleri yaqalanğanlarnı birer-birer çağırıp, olar, çetel vatandaşları olıp, Rusiye Federatsiyasınıñ toprağı olğan Qırımda bulunuv tarzını bozğanı aqqında haber eteler. Meclis temsilcileri ve uquq qoruyıcılarğa olarnıñ Qırımda bulunuvı 90 künden ziyade olmamaq kerekligini bildirdiler.

«Birer-birer subetke çağıralar ve, açıqtan bir şey añlatmayıp, nasıldır bir protokollarnı tizeler», – dedi Zarema Bariyeva ve yaqalanğanlar Qırım qaydı ile Ukraina vatandaşları olğanını qayd etti.

O şunı da bildirdi ki, Sinaver Kadırov yürek ameliyatını yapmaq içün çıqacaq edi.

Qırım.Aqiqat yaqalanğanlar ile bağ qurmağa areket ete, amma telefonları cevap bermey. Tuvğanlarınıñ fikrine köre, Rusiye sıñırcıları telefonlarını tutıp ala bile edi.

Rusiye qanunlarına köre, Rusiye Federatsiyasında çetel vatandaşlarınıñ ya da vatandaşlığı olmağan şahıslarnıñ bulunuv tarzınıñ bozuluvı «memuriy para cezasınıñ berilmesi ile Rusiye sıñırlarından sürgün etilmesini nazarda tuta».

Qırım «sıñırında» yaqalanğan Sinaver Kadırovnı mahkemege alıp kettiler

Yanvar 23 künü Meclis azaları Eskender Bariyev ve Abmecit Suleymanov ile birlikte Qırım çıqışında yaqalanğan qırımtatar milliy areket iştirakçisi Sinaver Kadırovnı mahkemege alıp kettiler.

Bunı Qırım.Aqiqatqa Qırımtatar halqınıñ aq-uquqlarını qorçalav komitetiniñ reisi Eskender Bariyev bildirdi.

Qırım FHH ve sıñır hızmetinde buña izaat bermeyler.

«Onı şimdi mahkemege alıp keteler. Onı, dersiñ, «sıñır» keçüvinde memuriy bozuluv etkeninde qabaatlaylar, sanki o, Rusiyede 90 künden ziyade bulunğan çetel vatandaşıdır. İşbu qabaat boyunca şimdi Ermeni Bazarda mahkeme toplaşuvını keçirecek olalar», – dedi Bariyev.

Bunıñ ile o şunı da qayd etti ki, dekabr ayında, yani bir ay evelsi, Sinaver Kadırov «sıñır»dan keçken edi.

«Öz tarafından Sinaver Kadırov mahkeme toplaşuvınıñ başqa künge keçirilmesi aqqında ariza-muracaatını yazdı, çünki onıñ qollarında, bizde olğanı kibi, İstanbul seferine biletleri bar. O, hastalığı boyunca vesiqalarnı taqdim etti. Sinaver Kadırov yıl evelsi ameliyatnı keçirgen edi, şimdi ekim mesleatı içün Türkiyege baracaq ola. Ondan bu muracaatnı qabul eterlermi, bilmeymiz, çünki «sıñırda» buña qulaq asmayıp, episi bir Sinaver Kadırovnı mahkemege alıp ketecegini bildirdiler», – tarif etti Bariyev ve oña, Abmecit Suleymanov ile «sıñırdan» keçmege izin berilgeni aqqında bildirdi, olar şimdi İstanbul seferine yoluna devam eteler.

Bariyevniñ aytqanı kibi, Rusiye sıñır noqtasına Qırımtatar halqınıñ aq-uquqlarını qorçalav komitetiniñ davalı konferentsiyasında bulunğan FHH hadimi keldi eken.

Qırım FHH ve sıñır hızmetinde buña izaat bermeyler.

XS
SM
MD
LG