Link açıqlığı

Qırımtatar halqınıñ aq-uquqlarını qorçalav komiteti koordinatorınıñ dairesine belgisiz şahıslar keldi


Qırımtatar halqınıñ aq-uquqlarını qorçalav komitetiniñ koordinatorı Sinaver Kadırov

İşğal etilgen Qırımda, evel Qırımtatar halqınıñ aq-uquqlarını qorçalav komiteti koordinatorı Sinaver Kadırov yaşağan daire qapılarına belgisiz şahıslar keldi.

Bunı Qırım.Aqiqat saytına şu evde yaşağan sakinler bildirdiler.

«Al-azırda belgisiz şahıslar 60 let Oktâbrâ soqağına, Sinaver Kadırov evelleri yaşağan adresi boyunca, kelip, bar küçü ile qapığa ura, açmağa talar eteler, olarğa Sinaver Kadırov kerek eken», – dep bildireler şaatlar.

Aytqanlarına köre, olar evge uquq qoruyıcı organlarınıñ hadimlerini çağıracaq olalar.

Qırım.Aqiqat bildirgeni kibi, keçken cumaertesi künü sport qıyafetinde belgisiz şahıslar Qırımtatar halqınıñ aq-uquqlarını qorçalav komitetiniñ konferentsiyasına keder etecek oldılar. Sovet Sotsialistik Cumhuriyetler Birliginiñ soñki dissidenti olğan Sinaver Kadırov işbu konferentsiyanıñ teşkilâtçılardan biri edi.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG