Cumaertesi künü, yanvar 17-de, Aqmescitte Qırımtatar halqınıñ aq-uquqlarını qorçalav komitetiniñ bütünqırım konferentsiyası ötkerilmeli. Tedbir yerli saatine köre saat 11-de Vorovskiy soqağındaki Marakand qavehanesinde başlanmalı. Tedbir başlanmazdan evel konferentsiyanı bozacaq olğan adamlar keldi.
Qırım.Aqiqat mühbiri bildire ki, qavehane yanına eki qara maşina keldi, onğa yaqın adam çıqtı, biriniñ qıyafetinde «Rusiye» dep yazılğan edi. Soñra olarnıñ yanına daa yigirmi kişi keldi, olar konferentsiya iştirakçileri qayd olunğan binağa «provokatorlar» qıçırıp kirmege tırıştılar.
«Bir qısmı içeri kirdi, bir qısmı da tışarıda qala. Olarnıñ çoqusı – qırımtatar halqınıñ temsilcileridir», – dep haber ete Qırım.Aqiqat mühbiri.
Onıñ aytqanına köre, konferentsiya iştirakçilerini qayd etken qadınlar davet etilmegen musafirlerni binadan çıqarmağa tırıştılar, lâkin yapamadılar. Neticede Komitet reberligi bazı adamlarğa konferentsiyada qalmağa izin berdi. Tahminen 5-8 kişi qayd etile.
Binanıñ yanında Qırımtatar Milliy Meclis vekilleri, matbuat vastaları, cemaat vekilleri buluna.
Tedbir teşkilâtçıları bildire ki, konferentsiyada qırımtatar halqınıñ al-vaziyeti, qırımtatarlarnıñ Rusiye ordusında hızmeti ve topraq meseleleri baqılacaq.
Qırımtatar halqınıñ aq-uquqlarını qorçalav komiteti qırımtatarlarnıñ evlerinde sıq-sıq keçirilip başlanğan tintüv, olarnıñ ğayıp olması ve apiske alınmasından sebep meydanğa ketirilgen edi.
