Rusiye matbuat vastalarınıñ Ukraina vaziyetine diqqatı zayıflaştı. Bunı «Telekritika» cemaat teşkilâtı tarafından 2014 senesiniñ soñunda keçirilgen tedqiqatnıñ neticeleri tasdiqlay. Aynı vaqıtta, neşirniñ malümatına köre, Ukraina informatsion alanında küreşinden vazgeçmemek kerek, çünki Rusiyeniñ arbiy istilâsı ep devam ete. Söz serbestligi boyunca parlament komitetinde bu kibi cenk jurnalistler tarafından alıp barılmaq kerekligini tüşüneler.
«Rossiya-1» Rusiye federal telekanalında seneniñ başında Ukraina aqqında haberler 45 daqiqanı qaplap alsa, şimdi 15 daqiqa oldı. Bu neticeni yıl boyu Rusiye matbuat vastalarınıñ teşviqatını nezaret etken «Telekritika» mütehassısları bildireler. Aynı vaziyet Rusiyeniñ matbaa neşirlerinde de yüz bere.
Diana Dutsik, «Telekritika» cemaat teşkilâtınıñ icraiy müdiri, aytqanı kibi, Rusiye akimiyeti özü de işbu suniy informatsion alanınıñ mabüsi oldı. Şimdi Rusiyede bir sıra mesele bar ve, bu sebepten, Ukraina mevzusından endi çetleşmege istese bile, bunı yapmağa qolay olmaz, çünki cemaatçılıqnıñ fikri bugün mütenasip bir şekilde pekitilgen. Rusiye akimiyeti birden öz menfaatını deñiştirse, ürmetini coyar. Şunıñ içün diqqatnı yavaş-yavaş azlaştıralar.
«Menimce, bu endi Rusiyeniñ siyasiy ketişatlarınıñ aksidir, faal teşviqat ise Rusiye akimiyeti ealige Qırım ve Ukrainanıñ Şarqında olayatqan vaziyetni añlatmaq kerekligi ile bağlı. Şunıñ içün bu kibi faal teşviqat alıp barıla edi»,– dey Dutsik.
Keyfiyetli çet yayınlav – teşiqat ile küreşniñ esas aleti
Rusiye teşviqatı ile küreşmek ve ileride dezinformatsiyadan saqınmaq içün Ukraina çetelge yapılacaq yayınlav tertibatını eyileştirmek kerektir, dep tüşüne «Telekritika» cemaat teşkilâtınıñ idare reisi ve esasçısı Natalya Ligaçeva.
«Memleketniñ vazifesi – Ukraina vaziyeti aqqında doğru malümatnı dünyanıñ er bir çetine dağıtmaq, amma, bugün, teessüf ki, böyle bir şey yoq. Bunı küçlü çet yayınlav yapmalı, fırsatımız da bar. Biz er vaqıt bunı aytamız da, amma ne içündir bugün olğan strukturanı pekitmege istemeymiz, bizde BTB, UTR, Ukraine Today bar. Bunıñ yerinde biz nazirlikni, memuriy tertibatnı teşkil etemiz, elimizde olğan imkânlarımıznı ise eyileştirmeymiz. Çet yayınlavnıñ daa bir maqsadı – Rusiyege añlı sürette qol tutqan Qırım sakinleriniñ añına yetmektir», – dedi o.
Ukrainliler informatsion siyasetniñ pekitilmesinde ihtiyac duya ve informatsion havfsızlıq ile bağlı qararlarğa qol tutmağa azır, bunı «Telekritika» tarafından keçirilgen sorav da tasdiqlay. Cevap bergenlerniñ 49% Ukrainada çetelge yayınlavnı keçirecek kontrteşviqatlı televizion kanalnıñ olmaq kerekligi aqqında ayta. İnformatsion siyaset nazirligi bunı BTB telekanalınıñ negizinde yapmağa teklif etken edi. Evel çetel vatandaşları içün Ukraine Today telekanalı açılğan edi.
Kontrteşviqat tek yayınlav vastası ile çalışmaycaq
Kontrteşviqat – yalıñız jurnalistlerniñ vazifesi degil, dep aytalar söz serbestligi boyunca parlament komitetinde.
Komitet reisiniñ muavini, deputat Sergey Vısotskiy qay ekeni kibi: «Kontrteşviqatta yalıñız jurnalistler degil de, Ukraina aqqında diger memleketlerde olğan malümatnı talil ete bilgen, regional hususiyetlerni añlağan ve devletniñ er bir vatandaşına muayyen bir malümatnı bergen memleketniñ
Kontrteşviqatta yalıñız jurnalistler degil de, memleketniñ bütün diplomatik ağı iştirak etmeliSergey Vısotskiy
bütün diplomatik ağı iştirak etmeli. Eger de biz bu kibi teşviqatnı tek yayınlav küçleri ile teşkil etsek – telekanallarda, çet yayınlavlarda o çalışmaz. Çoqusı allarda jurnalist faaliyeti degil de, mahsus devlet organları tarafından nezaret etilmesini talap etken bir arekettir», – dey o.
Deputatnıñ fikrine köre, kontrteşviqat aqqında tafsilâtlı malümatnı bermege mümkün degil, aks alda o çalışmaz.
