Link açıqlığı

Qırım-Lvov «E97 Leyhası»: Cenk mevzusını qapatmağa vaqıt keldi


Aleksandra ve Aleksandr Krolikovski, Lvov, «Yañıdan başlamaq» temaşası

Lvov – E 97 leyhası çerçivesinde olıp keçken tedbirler yekünlendi. Aqyarlı foto ressamlar soñki temaşanı azırladılar. Olar, arbiy tehnika ve askerlerniñ qabirlerini akis etken resimlerni beyaz kâğıtqa çevirdiler. «Yañıdan başlamaq» serlevalı temaşa aqqında müelliflerniñ özü KrolikowskiArt taqımnıñ azaları ikâye ettiler.

Aqyarlı Aleksandr ve Aleksandra Krolikovski aytqanları kibi, cenk mevzusı ğayet mot oldı. Bundan vazgeçmek içün olar «canlı» ve «cansız» suv ile temaşanı azırladılar, şu suv ile cenkniñ şaatları ve aqibetlerini sildiler.

Aleksandr Krolikovski bildirgenine köre, ğaye ta 2012 senesi peyda olğan edi. «Biz Aqyarda türk askerleri qabristanı yanında yaşay edik. Aqyar limanından gemiler Suriyege yol alğanını köre edik. Bu gemiler Suriyege cenkleşmek içün ketkenini bile edik», – dep hatırlay Aleksandr.

Aqyar cenk merkezinde bir qaç kere bulunğan edi. Qırım cenki, Ekinci cian cenki…Ressamlar küreş meydanlarını qıdırıp, şu yerlerde resimler çektiler. «Biz dava yerlerini taptıq, arbiy tehnikanı çıqardıq, soñra tamam şu plönkağa cenklerde elâk olğan askerlerniñ qabirlerini çektik», – dey Aleksandr.

Ressamlar arbiy tehnika ve onıñ qullanuvı aqibetinde elâk olğan askerler bir resimde nasıl akis olunacağınen meraqlandılar.

Bizni ne vaqıt böldiler?

Aleksandr ve Aleksandra Krolikovski qayd etkenleri kibi, cenk, küreş kibi mevzularnı mahsus açıp, cemaatçılıqnı yañı davalarnı başlamağa teşviq eteler. «Çoq vaqıt keçti, amma ale daa biz – ğalipler, olar ise, duşmanlar deyler. Böyle etip, adamlarnı yutqan ve yutquzğanlarğa böleler», – dey Aleksandr.

Bir tarafta – qaramanlar, digerleri ise, yoq, demege yañlış. «Er tarafta bulunğan adamlar cinayetler yaptılar», – dey Krolikovski. Onıñ fikirince, Aqyar şeeriniñ esas ğayesi duşmannı tapmaq. «Çünki bu arbiy şeer. Ve mında arbiy teşviqat birinci yerde buluna», – dep qayd ete ressam.

Aqyarlılar bütün adamlarnı ekige böleler – şeer sakinleri ve başqalarına – batı alemine. «Yevromaydan başlağanda, yevro qısımı endi duşmanlarğa aitligini köstere edi», – dep añlata ressam.

Amma, Aqyarda farqlı fikirde bulunğan adamlar da bar, dey.

Aleksandrnıñ fikirince, cenkte ğalipler ya da yutquzğanlar yoq, tek qurbanlar bar. «Amma, cenk ne olğanını añlamaq kerek. Avropada adamlar daima cenkleşe ediler, amma şimdi olar Avropa Birligine kirip, birlikte tınç ayatnı qurmağa tırışalar. Onıñ içün keçmişni teşviqat içün qullanmaylar», – dey Aleksandr.

«Cenk ve ğalebe kibi mot añlamlarnı yoq etmeli», – dep ilâve ete qadını.

Ressamlar eminler, ğalebe – hastalıqqa oşağan bir şey. «Cenkni kim başlağanını tekmil bilmeymiz. Nasıl olğanını bilmeymiz. Tek soñki 20 yıl içinde cenk 1939 senesi başlağanını ayta bilemiz. Sovet Birligi Almaniyanen beraber Poloniyanı bölecek oldılar. Bunı aytmağa yasaq edi. Aqiqat qayda? Cenk 1941, 1939 ya da 1938 senesi başladı? Belki de başta Çehiyanıñ işğali yüz berdi, ve bundan soñ cenk başladımı? Bunı bitirmek kerek. Amerika yerlileri yapqanları kibi, baltanı topraqqa kömmek kerek. Biz er şeyni yañıdan başlaymız, demelimiz», – dey Aleksandr Krolikovski.

Temaşa musafirleri
Temaşa musafirleri

Start Over temaşası Harkovde oktâbrniñ 10-nda kösterilgen edi. Amma, bazı musafirler bu tedbirge menfiy qıymet kestiler.

Lvov sakinleri bam-başqa davrandılar. Musafirlerniñ ekseriyeti teren tüşüncilerge dalıp, evlerine qayttılar. Leyha «Cemaat faalliginiñ ustahanesi» programma çerçivesinde eda etile. Sergi iştirakçileri Aqmescit (Dinara Ahtemova), Aqyar (Aleksandr ve Aleksandra Krolikovskiye, Vitaliy Fomenko, Nadejda Terehina), Lvov (Aleksandra Davıdenko), Münhenniñ (Gerbert Romeç) vekilleridir.

XS
SM
MD
LG