Link açıqlığı

Kiyev milliy universitetinde qırımtatar filologiyasını ögretip başladılar


Kiyev – Birinci kere Ukrainanıñ qıtasında «qırımtatar filologiyası» bölügi açıldı. Qırım tamır halqınıñ tili ve edebiyatını Şevçenko adına universitetiniñ talebeleri sentâbrniñ 1-nden başlap ögrenecekler. Bilgi künü KMU-niñ filologiya İnstitutında kelecekte qırımtatar filologlarından ibaret ilki akademik gruppasınıñ tantanalı açıluv merasimi ötkerildi.

Birinci kurs talebeleri, oquv yurtunıñ memuriyeti vekilleri, ocalardan ğayrı, bayram toplaşuvında Meclis reisi Refat Çubarov, «Tış işler Maydanı» fondunıñ reberi Bogdan Yaremenko, milliy areket iştirakçileri bulundılar. Musafirler toplaşqanlarnı selâmlap, studentlerge baa kitapçıqlarını teslim ettiler.

Şevçenko adına KMU-niñ ilmiy-pedagogik işleri boyunca prorektor Vladimir Şevçenko talebeler ögünde çıqışta bulundı: «Kiyevde qırımtatar cemaatçılığı muracaat etip, qırımtatar tili ve edebiyatı bölügini açmağa teklif etkende, bu ğaye ihtimalsız kibi köründi. Amma, bir qaç künden soñ, filologiya İnstitutımız seslendi ve tasil ve ilim naziri Sergey Kvitke ricada bulundıq. O, bu bölükni açtırmağa razılıq berdi».

Bugrov aytqanı kibi, bölükni acele sürette azırladılar, bedava yerlerni açmaq içün kerekli vesiqalarnı topladılar. Neticede, er şey vaqtında azır edi, nazirlik 10 bedava yerni ayırdı. Qırımtatar filologiyasını ögrenmek istegenlerniñ sayısı az degil edi. Arizalarnı qabul etken komissiyada bildirgenleri kibi, bir yerge 6 adam iddia etti.

Meclis reisi Refat Çubarov, KMU-da yañı bölükniñ açıluvı müim bir vaqia olğanını qayd etti, amma, evelden tamır halqnıñ tili Kiyevde ögretilmegenine yazıqsındı.

«Bu vaqianıñ ameliy faydası da bar. Dört yıldan soñ, bakalavr mezunları Qırım şaraitlerinde çalışmağa azır olacaqlarına ümüt besleymiz. Çünki, bu vaqıtqa qadar Qırım tolusınen azat olunacağında iç şübemiz yoq», – dedi Meclis reisi.

Eñ meraqlısı şu ki, birinci kurs talebeleri arasında iç bir qırımtatar vekili yoq. Refat Çubarov, bunı, bölük açılğanı aqqında haber keç ilân etilgeninen bağladı.

«Diger millet balaları qırımtatar tilini kelecek zenaatı olaraq seçkenleri pek quvançlı. Kiyev milliy universitetiniñ bütün qırımtatarları olarnı qayğıracaqlar, dep añlaştıq.Men bellesem, pek meraqlı bir gruppa tertip etilecek», – dep añlattı Qırım.Aqiqatqa Meclis reisi.

«Tış işler Maydanı» fondunıñ reisi Bogdan Yaremenko bildirgeni kibi, qırımtatar filologiyasını ögrengen talebeler ileride icraiy akimiyetniñ çeşit organlarında çalışmaq mümkünler, olarnıñ vazifelerine Qırımnıñ qaytarıluvı ve yarımadanıñ tamır halqı aq-uquqlarınıñ qorçalanuvı kirecek.

«Yañı zenaat – kelecek devletimizniñ temel taşıdır, çünki qırımtatar tili mütehassıslarına büyük ihtiyac bar. Ukraina havfsızlıq hızmeti, Tış işler nazirligi ve diger nazirlikler içün sizler pek kereksiñiz», – dedi Yaremenko.

Qırım.Aqiqat ile subetleşkende, talebeler yapqan seçimniñ çeşit sebeplerini aydınlattılar. Kimdir, qırımtatar medeniyetini begengeni içün, kimdir, yarımada işğali sebebinden bu zenaatnı sayladı,

«Devlette olğan vaqialardan soñ, Maydan ve Qırım işğalinden soñ qırımtatarlarğa yardım etmek kerek: til ve medeniyetini ögrenmelimiz. Ne aytsañ ayt, amma, Ukraina 20 yıldan ziyade Qırımnen oğraşmadı»,– dep añlatta birinci kurs talebesi Sergey Prişçep.

Qırımtatar filologiyası bölügine kirgen talebeler tek qırımtatar tili degil de, ingliz ve ukrain tillerini de ögrenecekler. Esas til boyunca derslerden ğayrı, olarnı, fonetika, til ve edebiyat tarihı, til stilistikası, tercimanlıq nazariyesi ve praktikası bekley.

XS
SM
MD
LG