Link açıqlığı

... Ukrain vatanperverligine qorantamıznı 90-ncı yıllarnıñ soñunda oğlan qardaşım ögretmege tırıştı. Özbekistanda doğıp, birinci ve ilerideki doğğan künlerni o tarihiy vatanda qayd etti. O pionerler zamanına rast kelmedi ve atta ukrain tilini ögrendi. Biz tatalarımıznen ukrain tilini ögrenmedik, çünki mında birinci sınıftan başlap tasil almadıq.

Kerçek aytsam, ukrainliler aqqında çoq şey bilmey edim, Qırımda sovet zamanında olar aman-aman yoq ediler. Temiz ruslar da yoq edi – tek balalar degil de, ocalar da qarışıq bir tilde laqırdı ete ediler, bizler Orta Asiyada ösken balalar içün bunıñ episi yat kele edi.

Mustaqil Ukraina zamanında bir şeyler deñişken, ğaliba. Qardaşım, futbol oyunı başlağanda Ukraina marşı yañğırağan vaqıtta er kesni yerinden turğuza edi. Bu da yeterli degil – mektep divarında asılğan plakattan yazılıp alınğan bu marşnı ezberden, yırlap ta almaq kerek edi.

Elbette, o vaqıt şimdiki kibi, vatanperverlik duyğuları asıl olmay edi.

Biz zornen özümizni tutıp, külmemege tırışa edik. Üç qız olıp ta, bir oğlançıq dünyağa kelgen soñ, onı az –buçuq erkeleteler. Evimizde tek bir dane televizor bar edi, onıñ içün futbolnı er kes mecbur baqa edi. Qardaşım, «Ukraino, vpered!» yazılarnen plakatlar yasap, televizor ögünde sallap otura edi.

Bir kere men onı masa başında oturıp, futbol oynağanını rast ketirdim (oyuncılar yerine kapiklerni alğan), bütün izaatlarnı ukrain tilinde yaptı: «Mi prodovjuеmo prâmu translâtsіyu zі stadіonu «Dinamo», poçinaеtsâ drugiy taym matçu «Dinamo» (Kiеv) – Şahtar (Donetsk). Pіslâ perşogo taymu perevaga na botsі «Dinamo» z rahunkom 2:0…».

Qardaşım, ukrain tilinde izaatlarnı diñlemege alışqan, Moskvada keçken oyunnı baqqanda: «Men begenmeyim, sanki bir şeyler yetişmey», dep ayttı.

Soñra biz üykenler, onı Aqmescitte «Tavriya» – «Dinamo» oyunlarını baqmağa alıp ketken edik, ösken soñ, dostlarınen qatnadı.

Kiyevge iş boyunca barğanda, bahşışı meselesi iç te turmay edi. Oña ukrain timsalleri resim etilgen futbol mevzusında ediyeler taşıy edik. «УКРАЇНА» yazısı olğan futbolka onda çoqtan bar, amma, şimdi o daa aktual oldı.

Onıñ kibi, mustaqil Ukrainаda doğıp, öskenler çoqtır. Bu nesil sovet zamanını bilmey. Rusiyede ölmege arz etken bir qaç qart olarnıñ kelecegini yoq etmemeleri kerek…

Elzara Beşuyli, qırımlı

«Bloglar» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün

XS
SM
MD
LG