Link açıqlığı

Aqmescit – Eñ yaqın vaqıtta Qırımnı MTS ve Kiyevstar kibi büyük ukrain mobil operatorları terk etecekler. Şirketler daimiy sürette qıyınlıqlarnen rast keleler ve qırımlılarnı bağ-alâqa ile kerekli seviyede temin etip olamaylar. Qullanıcılar da, grivna yoq etilgen soñ, telefon ve İnternet esaplarını nasıl etip ödecegini tüşüneler.

Qırım işğal etilgen soñ, ukrain mobil operatorları çeşit meselelerge oğratscağı birden belli oldı. Aprel ayında yerli «akimiyet» vekilleri yarımadada kendi «Krımsvâz» bağınıñ teşkil etilmesiniñ zaruriyeti aqqında aytqan ediler, soñra, yarımadağa Rusiye mobil operatorlarnıñ kelüvini bildirgen ediler.

Memurlar qayd etkenleri kibi, bu qıyınlıqlar Qırımnıñ statusı ve sakinlerniñ menfaatlarınen bağlı. Amma, sim-kartlarnı kendi esabına deniştirmege azırlarmı ya yoq, bunı bir kimse soramadı. Faqat, bütün deñişmelerni ilk-evelâ sakinler is ettiler.

Operatorlarnı dalğasız qaldıralar

PEOPLEnet şirketi birinci olıp yarımadada faaliyetini toqtattı. Şirket müdiri Mihail Paykinniñ bildirgenine köre, 100 biñ sim-karta ile sağlıqlaşmağa mecbur oldılar.

Mobil operatorları ve İnternet provayderlerniñ yarımadanı terk etmelerniñ birinci sebebi dalğalar ile bağlı, olarnı rusiyeli arbiyler kendi maqsadlarında işleteler.

Rusiye alâqa ve kommunikatsiya boyunca naziri Nikolay Nikiforov bildirgeni kibi, Rusiye qanunları boyunca çalışmağan bütün ukrain operatorları dalğalarnı boşatmaq kerek olacaqlar. Ondan soñra, bu dalğalarnı satılışqa ya da mezatqa çıqaracaqlar.

Aynı zamanda, belli ve büyük operatorlar şimdilik faaliyetlerini devam eteler. Amma, kün-künden daa qıyın ola. Qırım müşterileri de çeşit meselelernen rast keleler.

Qullanılğan hızmetler içün nasıl para ödemeli?

Birinciden, meseleler ukrain grivnasınen bağlı. Endi bir aydan ziyade mında çetel para birlemi olraq sayıla. Qırımda çalışqan mobil operatorları özüniñ nevbetinde rusiyeli rublelerni qabul etip olamaylar, çünki olar içün de bu çetel para birlemi.

Ukrain grivnasını qabul etken terminallar da qalmadı, desek yañlış olmaz. Em de, qırımlılarnıñ özünde grivna qalmadı, çünki olar aylıqlarnı rublede alalar. Onıñ içün, qullanıcılar tış dünya ile bağda olmaq içün tölevlerni nasıl yapmaqnı tüşüneler.

Aqmescit sakini Mariya şikâyet ete «Men Aqmescitte grivnanı qabul etken bir qaç merkezni taptım. Onıñ içün mobil telefonı ve İnternet içün anda para töleyim. İleride ne olacağını bir kimse bilmey, amma belgisizlik bezdirdi: ya rusiyeli operatorlarnı qoşsunlar ya da ukrain operatorlarnen ne yapmaqnı añlatsınlar».

Bazı qırımlılar soyları ya da tanışlarını qıtada esaplarnı qapatmağa rica eteler. Ya özleri barıp, töleyler. Amma, mobil operatorları ve provayderler Qırımnı terk etseler, esaplarında qalğan para yoq olacaq.

Operatorlar susıp oturalar

Aynı zamanda, operatorlar qırımlılarğa özleri iç bir şey añlatmaylar.

«Kiyevstar»nıñ saytında iç bir şey añlatılmay. Qırımlılar bu telefon bağını çoq qullanmasalar da, İnternet provayderi keñiş işletile.

Qırım.Aqiqatqa şirkette yüz bergen meselelerniñ çezüv yollarını bildirmediler. Amma, çareleri olğanı qadar çalışacaqlarını dediler. Müşterilerge hızmet etüv noqtaları ve esaplarnı toldurmaq yerleri daa çalışa.

ÇAO «MTS Ukraina» ileride nasıl çalışacağı da belli degil. Amma, mında da faaliyetlerini devam ettireceklerini qayd eteler. Şirket yalıñız tölevler meselesinen degil de, telekommunikatsion ağlarınıñ qullanuvı problemlerinen rast kele. Bu sebepten, müşteriler arasında bağ yaramay olması mümkün.

Keçenlerde MTS şirketi qullanıcılarğa bağnen bağlı meseleler çıqması mümkünligi aqqında bildirgen sms yolladı.

Rusiyeli operatorlarnı ukrainlilerniñ sayesinde teşviq etelermi?

Aynı zamanda, şirketlerde eminler, «MTS-Rossiya» operatornıñ sim-kartlarnı daa çoq satmaq içün ukrain operatorlarnıñ yarımadanı terk etkenleri aqqında öşeklerni tarqatalar.

Bu kibi «cenkniñ» misali olaraq bazar ertesi künü, iyunniñ 30-nda matbuat vastalarında Aqyarda «MTS Ukraina» bölüklerni qapatqanı aqında malümat çıqtı. Ertesi künü şirket bunı red etti. Amma, yerli sakinler endi Rusiye sim-kartlarnı almaq içün nevbetlerge tizildi.

Amma, şunı qayd etmeli ki, qırımlılarnıñ episi yañı sim-kartlarnı almağa aşıqmay. Birinciden, paranı masraf etmege istemeyler. Ekinciden, Ukraina ile bağlanıp olamaycaqlarından saqınalar.

XS
SM
MD
LG