Qırımtatarlarnıñ yetekçisi Ukraina Hafsızlıq Hızmeti ileride de vesiqalarnı teslim etecegine işana
Kiyev – Qırımtatarlarnıñ milliy lideri, Ukraina halq deputatı Mustafa Cemilev Ukraina Hafsızlıq Hızmeti tarafından (SBU) arhiv vesiqalarnı teslim etüvine yüksek qıymet kesip, ileride de, Yanukoviçniñ üküm devirine ait vesiqalarnıñ aydılatılacağına ümüt besley.
Mayıs 29 künü Ukraina Hafsızlıq Hızmeti Cemilevge qırımtatar halqı sürgünliginen bağlı arhiv vesiqalarnı teslim etti. Vesiqalar arasında, hususan, 1944 senesinden başlap ve bugünge qadar halq rast kelgen qıyınlıqlarnı tasvirlegen tarihiy vesiqalardan ibaret 4 cılt bar.
Bunen beraber, qırımtatarlar lideri, «Yanukovi ükümi devirinde, Rusiye Federal hızmeti ile birlikte qırımtatarlarnı bölmek ve qırımtatar halqınıñ Meclisini yoq etmek maqsadında yapılğan areketler»ni tasdiqlağan vesiqalarnı da elde etecegine işanç bildirdi.
Mustafa Cemilev bu kibi vesiqalarnıñ aydınlatuvınıñ müimligini qayd etip, ileride de Hafsızlıq Hızmeti ile, hususan Ukraina bütünligi meselesinde işbirlik devam ettirilecegini qayd etti.
Aytqanına köre, demokratik şekilde ükümdarlıqnıñ esas hususiyeti, gizli malümatlarnıñ ve evelki avtoritar qurumınıñ sırlarını aydınlatmaqtan ibarettir.
Hafsızlıq Hızmetinde qayd etkenleri kibi, qırımtatarlarnıñ repressiyaları ve aqlanuvınen bağlı vesiqalarnıñ ekseriyeti Moskvada buluna. Bunen beraber, bir çoq vesiqalar Qırım Cumhuriyetinde olıp, olarnı şimdiki vaqıtta almaq imkânsızdır.
Qırımdaki vesiqalarnı almaq şimdilik imkân yoq, - uquq qoruyıcı
Harkov uquqqoruyıcılar gruppası reyeberlerinden biri Yevgeniy Zaharovnıñ Qırım.Aqiqatqa bergen izaatına köre, vesiqalarnı endi çoqtan bermek kerek edi.
«Qanun boyunca vesiqalarnı 30 yılğa gizlemek mümkün, olarnı çoqtan aydınlatmaq kerek edi. Bunı er yerde yapa ediler, çehiyalılar, poloniyalılar siyasiy repressiyalarğa bağlı vesiqalar meselesini birden çezdiler», - dedi o.
Amma, aynı zamanda, uquqqoruyıcı qayd etkenine köre, şimdilik Qırımdan vesiqalarnı almaq imkân yoq.
«Qırımda ukrain degil de, Rusiye qanunları çalışa, ve bu kibi vesiqalarğa irişim sıñırlıdır. Onıñ içün de, tamam sovet zamanında Rusiyede siyasiy repressiyalar aqqındaki vesiqalar kibi Ukraina Hafsızlıq Hızmetiniñ Qırımdaki arhivlerinde bulunğan vesiqalar Rusiye Federal Hızmetine berilecek, ve olarnı almaq mümkün olmaz», – dep qayd etti Zaharov.
