Ukraina Rusiyeniñ Ukraina akimiyeti kontrol etmegen topraqlarnıñ sakinlerine bermege planlaştırğan pasportlarını tanımaycaq, dep bildirdi Ukraina baş naziri Volodımır Ğroysman. Bu aqta Azatlıq Radiosı bildire.
«İstilâcı memleket bergen ve berecek olğan vatandaşlıqnı tanımaymız ve tanımaycaqmız. Bizim pasportımız bar – ğururlanğanımız, azatlıq ve demokratiya timsali olğan Ukraina pasportı. Bizim toprağımızda Ukraina vatandaşlarına berilgen pasportlarnı uquq bozuluvı olaraq tanımaq içün qarar alamız. Bu pasportlar qanunsız tanılacaq – devlet sıñırından keçkende ve devlette qullanılğanda», – dedi Ğroysman.
Aprelniñ 24-nde Rusiye prezidenti Vladimir Putin Rusiye qoltutqan aydutlar tarafından kontrol etilgen Ukraina şarqındaki rayonlarnıñ ve işğal etilgen Qırım sakinlerine Rusiye vatandaşlığını qolay almağa imkân bergen buyruqnı imzaladı. Ukraina ve ittifaqdaşları bu qararnı sert bir şekilde tenqit etkenler.
Aprelniñ 27-nde Putin Pekinde olıp, Kreml bütün ukrainalılarğa qolaylaştırılğan esnas boyunca Rusiye pasportlarınıñ berilüv imkânını baqa, dep bildirdi. Mayısnıñ 1-nde o, Qırımda doğğan ve yaşağan ukrainalılarğa üç ay içinde Rusiye pasportlarını bermege imkân bergen buyruqnı imzaladı.
Ukraina Tış işler nazirligi Rusiye akimiyetiniñ Rusiye tarafdarları küçleri tarafından işğal etilgen Donbas sakinlerine Rusiye pasportlarınıñ berilüvini qolaylaştırmaq qararını tenqit etti. Ukraina Rusiye akimiyetiniñ işğal altındaki Donbas topraqlarında yaşağanlarğa Rusiye pasportlarını qolay bermek qararı sebebinden Birleşken Milletler Havfsızlıq şurasına muracaat etti.
Yañı saylanğan Ukraina prezidenti Volodımır Zelenskıynıñ taqımı Facebook beyanatında Rusiye memleketimiz tarafından vaqtınca kontrol etilmegen topraqlarımızda bulunğan Ukraina vatandaşlarına Rusiye pasportlarını berüv fermanı ile işğalci devlet olaraq mesüliyetini tanıdı, dep qayd etti.
