Qırımdaki Rusiye Tahqiqat komitetiniñ idaresi ğayıp olğan ve daa soñra cesedi çuqurda tapılğan yerli sakinniñ öldürüvinden sebep cinaiy iş açtı. Dava Rusiye Ceza kodeksiniñ 105-inci maddesiniñ 1-inci qısmındaki (öldürüv) cinayet alâmetleri boyunca açıldı. Bu aqta iyülniñ 12-nde müessiseniñ matbuat hızmeti bildirdi.
Müessiseniñ qayd etkenine köre, Bağçasaray rayonınıñ köylerinden birinde havuznıñ yanında öldürüv alâmetleri ile ğayıp olğan yerli sakinniñ cesedi tapılğanına dair haber tünevin aqşam keldi.
İlk malümatqa köre, öldürüv sebebi nariye saçma yarası oldı.
Öldürüvden şübheli sayılğan kişi tapıldı ve yaqalandı. O, Bağçasaray rayonınıñ 37 yaşında sakini ola, dep qayd etti matbuat hızmeti.
«Yaqalanğannıñ aytqanına köre, o ve elâk olğan kişi arasında olğan borc sebebinden qavğa çıqtı. Tanışını öldürgen soñ cesedini çuqurda saqlap, üstüne taşlar attı, dostundan ise maşinasını başqa mesken noqtağa alıp ketmesini rica etti. Al-azırda adiseniñ bütün allarını belgilemek içün tahqiqat tedbirleri keçirile», – dep aytıla haberde.
Şübheli 15 yılğa qadar azatlıqtan marum etile bile.
Müessise elâk olğannıñ adını bildirmedi.
Daa evel haber etilgeni kibi, ğayıp olğan qırımtatarı Fahri Mustafayevniñ cesedi Bağçasaray rayonınıñ Aromatnoye köyü civarlarında topraqqa kömülgen alda tapıldı. Bu aqta qırımtatar faali Nariman Celâl Qırım.Aqiqat mühbirine bildirdi. Onıñ aytqanına köre, öldürüv sebebi «para ola bile».
Daa evel ğarbiy Qırımda Nikolayevka plâjında turistler boynuna girâ baylanğan er adamnıñ cesedini taptı. Şaatlar cesed saqatlanğan edi, dep bildirdi.
Qırım.Aqiqat elâk olğannıñ adını bildi. Bu qırımtatarı Raşid Yağyayevdir. Qardaşınıñ aytqanına köre, Raşid iş adamı edi. Onıñ ğayıp oluvı aqqında aprelniñ soñunda haber etilgen edi.
