Link açıqlığı

Saatnıñ esas haberi

Qırımda ğayıp olğan qırımtatarınıñ cesedi topraqqa kömülgen alda tapıldı – faal


Nümüneviy resim
Nümüneviy resim

Ğayıp olğan qırımtatarı Fahri Mustafayevniñ cesedi Bağçasaray rayonınıñ Aromatnoye köyü civarlarında topraqqa kömülgen alda tapıldı.

Bu aqta qırımtatar faali Nariman Celâl Qırım.Aqiqat mühbirine bildirdi. Onıñ aytqanına köre, öldürüv sebebi «para ola bile».

Celâlnıñ bildirgenine köre, Fahri Mustafayevni öldürüvden şübheli sayılğanlardan biri Rusiye politsiyasınıñ hadimleri tarafından tutuldı.

«Yaqalanğan öldürüv iştirakçilerinden biri Mustafayevge büyük miqdarda para borclu edi. O birisi kün saba (iyülniñ 10-nda – QA) rahmetli onıñnen saat 10:00-larda bağlanıp, Aromatnoye köyü rayonına körüşüvge ketti. Fahri Mustafayevniñ babası üyle vaqtında oğlunıñ telefonı qapalı olğanda qasevetlenmege başladı. Tuvğanları ve dostları politsiyanı celp etti. Cesed ertesi künü öldürilgenniñ dostları tarafından tapıldı. Olar köyge barıp, anda er yerni baqıp çıqmağa qarar aldı. Kelgende taze topraqnı körgenler, yaqınca barıp, beden parçalarını körgenler. Birden politsiyanı çağırğanlar. Tahminlerge köre, eñsege urğanlar ya da atqanlar, bunı tam olaraq ekspertiza aytacaq. Al-azırda üç kişi öldürüvde iştirak etüvden şübheli sayıla, olardan biri Fahrige borclu edi», – dep tarif etti faal.

Celâlnıñ aytqanına köre, nezaret kameraları rahmetliniñ maşinasını Aqyar rayonında qayd etkenler.

«Qıdıruv vaqtında, kameralarnı baqıp çıqqanda, Fahriniñ maşinasını Aqyar rayonında körgenler, tuvğanları şaştı, çünki Mustafayev anda barmaycaq edi. Kameranıñ qaydlarını diqqatnen baqqanda ömür arqadaşı dümen başında aqayı olmağanını tasdıqladı», – dep tarif etti Celâl.

Onıñ qayd etkenine köre, qırımtatarı Fahri Mustafayevniñ cenazesi iyülniñ 12-nde saat 15:00-da Bağçasarayda qılınacaq.

Al-azırda işğal etilgen Qırım müessiseleri bu malümatnı izaatlamadı.

Daa evel haber etilgeni kibi, ğarbiy Qırımda Nikolayevka plâjında turistler boynuna girâ baylanğan er adamnıñ cesedini taptı. Şaatlar cesed saqatlanğan edi, dep bildirdi.

Qırım.Aqiqat elâk olğannıñ adını bildi. Bu qırımtatarı Raşid Yağyayevdir. Qardaşınıñ aytqanına köre, Raşid iş adamı edi. Onıñ ğayıp oluvı aqqında aprelniñ soñunda haber etilgen edi.

XS
SM
MD
LG