Qırımtatar Milliy Meclisiniñ reisi, Ukraina halq deputatı Refat Çubarov iyülniñ 10-nda Moskvanıñ Qızıl meydanında qırımtatar milliy areketi iştirakçileriniñ tutuluvını izaatladı. O, «halq namusını saqlay ve küreşke azır», dep bildirdi.
«Soñki sefer 1987 senesi qırımtatarlar Qızıl meydanğa çıqıp, öz toprağına qaytmalarını talap etti, insanlar Sovetler birliginiñ çeşit köşelerinden kelgen edi… 32 yıldan soñ qırımtatarlar kene Qızıl meydanda. Halq boysunmadı, halq namusını saqlay, halq küreşke azır», – dedi Çubarov Facebook saifesinde derc etilgen video muracaatında.
O, iyülniñ 10-nda narazılıq aktsiyasına çıqqan er keske minnetdarlığını bildirdi.
«Qırımtatar Milliy Meclisi adından Qızıl meydanda ukrain halqınıñ serbestligini, siyasiy mabüslerniñ azatlığını, vaqtınca işğal etilgen Qırımda repressiyalarnıñ toqtatıluvını talap etken cesür qırımtatarlarğa teşekkürler bildirem», – dep qayd etti Çubarov.
İyülniñ 10-nda Moskvadaki Qızıl meydanda kütleviy narazılıq aktsiyasında iştirak etken yedi qırımtatarı tutulıp, Kitay-gorod politsiyasınıñ bölügine alıp ketirildi. Rusiye aq qorçalayıcısı Aleksandra Krılenkovanıñ aytqanına köre, Fevzi Abduramanov, Eskender Lümanov, Sinaver Nimetullayev, Reşat Emirüseinov, Siyar Gafarov, Enver Seytumerov ve Seyran Cemilev tutuldı.
Tutulğan faallerden biri Sinaver Nimetullayevniñ aytqanına köre, tutulğan yedi qırımtatar faali miting keçirüv tertibini bozğanında (Rusiye Memuriy cinayetler kodeksiniñ 20.2 maddesi) qabaatlandı.
Qırım.Aqiqat Moskvadaki «Kitay-gorod» politsiya bölüginiñ hadimi ile bağlandı, lâkin o, tutulğan faallerniñ bulunğan yeri aqqında suallerge cevap bermeyip, Moskvanıñ Merkeziy okrug iç işler idaresiniñ matbuat hızmeti ile bağlanmağa tevsiye etti. Anda ise mühbirniñ telefonlarını açmaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
