Qırımtatar Milliy Meclisiniñ reisi Refat Çubarov Latviyanı ve latış halqını Latviya Cumhuriyetiniñ mustaqillikni ğayrıdan tiklev kününen tebrikledi. Öz hayırlavında o, bu memleketniñ reberligine qırımtatar halqına qol tutqanı ve Qırımnıñ Rusiye işğalini tanımağanı içün teşekkürler bildirdi.
Bu aqta Çubarov Facebookta yazdı.
«Bu güzel imkândan faydalanıp, Qırımtatar Milliy Meclisi adından Latviya Cumhuriyetiniñ Seymine, Latviya siyasetçileri, diplomat, jurnalist ve cemaat erbaplarına Qırımnıñ Rusiye işğalcisinden qurtarıluvı içün beraber köstergen ğayretleri, qırımtatar halqı aqlarınıñ ğayrıdan tiklenmesine samimiy qol tutqanı ve Ukraina ile beraber Rusiye istilâsına qarşı olğanı içün minnetdarlığımnı bildirmege isteyim», – dep yazdı Çubarov.
2019 senesi mayısnıñ 9-nda qırımtatar sürgünliginiñ 75-inci yılı munasebetinen Latviya Seymi 1944 senesi mayısnıñ 18-nde olğan sürgünlikni ve qırımtatarlarnıñ on yıllarnen ğurbette tutulğanını halq genotsidi olaraq tanıdı.
Refat Çubarovnıñ qayd etkenine köre, Latviya Seymi Ukraina Yuqarı Radasından soñ 1944 senesi mayıs 18 sürgünligini ve on yıllar devamında qırımtatarlarnıñ ğurbet yerlerinde tutuluvını halq genotsidi olaraq tanığan dünyanıñ ilk parlamenti oldı.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Tahminen 200 biñ kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
