Qırımtatar Milliy Meclisiniñ reisi Refat Çubarov Qırımdaki qırımtatarlarnı mayısnıñ 18-nde qırımtatar halqı genotsidi qurbanlarınıñ hatıra yerlerini ziyaret etmelerine çağırdı. Bu aqta o, Facebook video muracaatında ayta.
O, hatıra yerlerini ekişer-üçer kişi olaraq, eñ çoq beş kişilik gruppalarnen mayısnıñ 18-nde saba saat 8:00-dan 15:00-ğa qadar ziyaret etmege çağırdı.
Çubarov, qırımtatarlarnı evlerinde, balkonlarda qara şeritli qırımtatar bayraqlarını asmalarına çağırdı.
Ukraina prezidentiniñ Qırım Muhtar Cumhuriyetindeki daimiy temsilciligi aktsiyada iştirak etip, qırımtatar halqı sürgünliginiñ qurbanlarını añmağa çağıra.
SEE ALSO: «Yapqanları içün ceza berilmedi, ne ivaz oldı, ne qanun»Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.