Mayısnıñ 11-nde sabadan Qırımnıñ İçki rayonı Yanış Taqıl (Zavetnoye) köyüniñ sakinlerinden biri Ayub Rahimovnıñ evinde tahqiqat tedbirlerini keçirgen Rusiye quvetçileri çağına yetmegen eki balanıñ anası Sahiba Burhanovanı İçki rayonındaki Rusiye İç işler nazirligi bölüginiñ migratsiya meseleleri bölügine alıp ketkenler. Bu aqta «Qırım birdemligi» birleşmesi Qırım.Aqiqatqa bildirdi.
Faallerniñ malümatına köre, başta Ayub Rahimovğa pasport idaresiniñ yolbaşçısı keldi ve tahqiqatçınıñ iznini alıp, azbarğa kirdi. Faallerniñ aytqanına köre, bundan evel tintüv yerine kimse alınmağan edi.
Qırımnıñ uquq qoruyıcı organları adiseni resmiy şekilde izaatlamay.
Aprel ayınıñ soñunda Rusiye quvetçileri «Hizb ut-Tahrir davası» boyunca mahküm etilgenniñ qardaşı yaşağan evni tintti ve onı sorğuğa çekti, dep haber etilgen edi. Bundan evel Aqmescitniñ Hoşkeldi mikrorayonında Ruslan Ramazanovnıñ evini OMON sarıp aldı, quvetçiler terakt aqqında haber etildi dep tintüv keçirdi.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.