Ukrain faal Oleg Prihodkonıñ tevqifini eki ayğa uzattılar, o, 2020 senesi fevral ayınace SİZOda tutulacaq. Qadını Lübov, onı soñki sefer evde oktâbrniñ 9-ında aqşam körgen edi, Oleg FSB hadimlerinen garajını baqmağa ketkende. Qırım.Aqiqat, çiçek çerebindeki fleşka, sevimli köpekniñ apansızdan ölümi, qomşular ile munasebetler em aqay ve babanıñ apis etilgeninden soñ qorantanıñ yaşayışı nasıl deñişkeni aqqında Olegniñ ailesinen laf etti.
- Dayı, biz seni sevemiz ve sen içün soñuna qadar küreşecekmiz! - dep, Kreml nezaretindeki Aqmescitniñ Kiyevskiy rayonınıñ mahkemesiniñ qora çilterini tutıp, qıçıra tevqif etilgen Oleg Prihodkonıñ yegeni.
- Ukrainağa şan-şüretler! - Prihodko, avtozaknıñ basamağında bir qaç saniyege toqtay.
- Qaramanlarğa şan-şüretler!
Prohodkonı mahkemege ketirgen avtozak
Keççe apisli qırımlınıñ advokatı Nazim Şeyhmambetov, Prihodko, kelip, onı desteklegen er keske minnetdarlığını bildirmege rica etti, dep ayttı. "Onı mahkemege kirsetkenlerde, o epiñizni kördi. Bu onı kercekten pek ruhlandırdı", - dedi advokat. Tevqifni 2020 senesi fevral 10-una qadar uzattılar. Mahkeme oturışı qapalı şekilde keçirile edi, protsesske Prıhodkonıñ tuvğanlarını bile yibermediler. Mahkeme ükmüniñ ilân etilmesine de kimseni kirsetmediler.
Advokat Nazim Şeyhmambetov
Onıñ içün Qırım - bu Ukraina, ve eñ esası - onıñ evi. Qorantamızda köçme meselesi köterilmey edi bileLübov Prihodko
Olegniñ qadını Lübov Prihodko, FSB hadimleri oktâbrniñ 9-ında saat 16:00-larda kelgenini hatırlay. Olar garajnı baqmağa rica etti, garaj ise azbarlarında degil, Saq trassası boyunca yerleşken Orehovo köyündedir: "Aqayım, gizlemege şeyi yoq dep ayttı. Ev urbasında ketti ve ondan soñ endi qaytmadı".
Babası ğayıp olğanıni bildirip, qızı Natalya politsiyağa ariza yazdı. Ekinci künü saba tahqiqatçı Dmitriy Gramaşovnıñ reberliginde evniñ özünde tintüv başlandı.
Lübov Prihodko
"Aqayım, Saq şeer memuriyetinde patlav azırlamasında şübeli sayılğanı aqqında bir qarar oqudılar. Er şeyni ast-üst ettiler ve, añlağanıma köre, qıdırğanlarını taptılar". Qadın, tahqiqat tedbirleri vaqtında cep telefonı ve fleşkanı atıp qoyğanlarını iddia ete: "Protokolda, bu şeylerniñ bizge ait olmağanını qayd ettim. Hususan çiçeklerimde tapqanları fleş kartası şaşırttı. Olar şu fleşkanı sanki tapqan çiçek çerebi tübünde onı saqlamaq imkânsız edi. Çiçek sadece yuvarlanacaq edi".
Tübünde fleşka tapılğan çiçek çerebi
Tintüvden soñ Lübov Prihodkonı sorğuğa çekmek içün alıp kettiler, o ise, Rusiye anayasasınıñ 51-inde maddesine atıf etip, özü ve yaqınlarına qarşı şaatlıq etmekni red etti. Bu, evlerinde keçirilgen ekinci tintüv edi, birincisini 2019 senesi fevralde yapqan ediler. O vaqıt quvetçiler, ukrain timsalâtnı, bayraqlarnı ve bir qaç plastik tüfek mulâjlarını tutıp alğan ediler, keççe ise qaytardılar.
Tutılıp alınğan tüfek mulajları
Lübov, FSB tintüv vaqtıda yapqan video çeküvni hatırlay: "Anda, videoda, alınğan şeylerniñ arasında svastikanen yapraqlarnı kösterdiler. Olarnı faşist timsalâtı dep yazıp qoydılar. Amma kerçekten olar, o yapqan arbiy tehnika modelleri içün yarlıçıqlar edi. Aqayımnıñ hobbisi öyledir, o aves ete, özü bu modellerni quraştıra, olarnıñ sıfatı aqqında çoq kitabı bar".
Lübov, Oleg yapqan modellerden birisi Saq tarih ve ülkeşınaslıq müzeyinde turğanını tarif ete: "Demek, müzeyge böyle şeylerni qoymaq mümkün - faşizm degil, evde yapıştırmaq ve quraştırmaq ise yasaq, öylemi?"
Oleg Prihodko yapqan arbiy tehnika modelleri
Kimer dostlarımız, e, çevirildi. Bazı tanışlarımız, aksine, bu qabaatlavga inanmadı. İşte, böyle baqsañ, buña kimse inanmayLübov Prihodko
Oleg, birinci tintüv ve memuriy tevqiften soñ Qırımdan köçüv meselesini qorantasınen muzakere ettimi sualine Lübov menfiy cevap berdi: "Asılında o, ic bir vaqıt Qırımnı Rusiye kibi qabul etmey edi. Onıñ içün Qırım - bu Ukraina, ve eñ esası - onıñ evi. Qorantamızda köçme meselesi köterilmey edi bile". Şimdi Prihodkonıñ qorantası haberlerni tek advokattan bile: "Advokat onda sıq-sıq ola, ebet. O er şeyni tafsilâtlı aytıp bere. Bizge ne mektüp, ne körüşüvlerni bermeyler".
Prihodkonıñ evinde şimdi dört mışıq ve köpek Yeva yaşay. Bundan evel olğan köpek, Olegniñ qapatılmasında soñ ertesi künü öldi. "Köpek bir künde öldi, biz oña diqqat bile etmedik. O, çoq afıra edi, sağlam edi, mında ise - birden yoq oldı. Oleg şaştı, ebet, men ise tüşünem ki, onı, keder etmesin dep, zeerlediler. Amma bu ancaq menim faraziyemdir"
Köpek Yeva
Mışıq Mışka
Lübov dey ki, aqayınıñ tutulğanından soñ qonuşma çevresi pek deñişmedi: "Biz qorantamıznen birlikte olğanımız kibi, öyle de birliktemiz. Kimer dostlarımız, e, çevirildi. Bazı tanışlarımız, aksine, bu qabaatlavga inanmadı. İşte, böyle baqsañ, buña kimse inanmay".
Qadınnı aytqanına köre, qomşular, mahkeme protsessi içün Oleg Prihodko aqqında müsbet hasiyetnamelerni yazdılar: "Mına, eñ yaqın qomşularımız, Oleg olarnen pek yahşı qonuşa edi, ve ne kerek olğanını bilip, olar birden yazıp berdiler, çoq sağ olsunlar".
Prihodko SİZOda kelecek yılğace tutulacaq. O, rusiyeli Maliyeviy nezaret hızmeti tarafından ekstremist faaliyetine ya da terrorcılıqqa ait olğan şahıslarnıñ cedveline kirsetildi.
Prihodkonıñ tutulğanını oktâbrniñ 10-nda saba kezlevli ukrain faali, yedinci çağırılış Ukraina halq deputatı Eduard Leonov haber etti. Faalniñ ömür arqadaşı Lübov Prihodko da tutulğan edi.
FSB hadimleri Rusiye Ceza kodeksiniñ 223.1 (patlayıcı maddelerni qanunsız azırlanması) ve 205 (terror ücümi) maddelerine istinaden qabaatlay.
2019 senesi fevralniñ 8-nde Qırımdaki FSB idaresiniñ hadimleri Saq rayonınıñ Orehovo köyünde Oleg Prihodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler. Rusiye quvetçileri Prihodkonıñ evinde keçirilgen tintüvni izaatlamadı. 2016 senesi iyün ayında Rusiye quvetçileri faalni maşinasındaki ukrain nomeraları içün tutqan edi.