Ukraina Avropa Birligi ve NATO ortaqlarına «Qırım platformasını» – yarımada işğaliniñ bitmesine yardım etecek yañı halqara teşebbüsni – taqdim etti. Bu aqta Ukraina Tış işler naziriniñ birinci muavini Emine Ceppar Avropa institutları ve NATO merkezinde eki kün devamında kerçekleştirgen körüşüvlerden soñ Brüsselde Azatlıq Radiosınıñ mühbirine bildirdi.
Cepparnıñ aytqanına köre, NATO «Qırım platformasınıñ» faaliyetine pek meraqlı, çünki «ittifaq Ukrainanıñ Qara deñiz telükesizligi meselesinde körgen problemlerini añlay». AB vekillerinen Kyiv «Qırım platformasınıñ» elementleri Avropa Birligine nasıl bütünleştirilecek», dep muzakere ete.
Ukraina Tış işler nazirligi, şimdi teşebbüske qoşulacaqlar aqqında aytmaq erte, «Qırım platformasınıñ» birinci sammiti ilân etile – onı kelecek sene ötkermege planlaştıralar, amma künü daa belli degil, dep ayta.
«Bu añlaşmalar olsa, olarnı ortaqlarımızğa yollaycaqmız, ve kelecekler, bu beyannamege qoşulacaqlarnı bilecekmiz. Mında bir obyektiv şey bar – pandemiya», – dedi Ceppar.
Mezkür teşebbüsniñ semereligini izaatlap, Emine Ceppar mantıqiy delilniñ özü müim, dep ayttı: «Bütün seviyelerde ortaqlarımızğa teşekkürler bildirem, olarnıñ fikirleri deñişse, bu qarar ve beyannameler olmasa edi, yüz degil, biñlernen reinemiz olur edi, dep aytam».
Emine Cepparnıñ qayd etkenine köre, yañı teşebbüste Qırımtatar Milliy Meclisi müim rol oynamalı.
«Olar Qırım esnasında esas menfaat saibi ola, der tüşünemiz. Tış işler nazirligi buğa bütün seviyelerde qol tuta».
Meclis reisiniñ muavini Ahtem Çiygoz Qırım.Aqiqat Radiosınıñ yayınında Ukraina prezidentiniñ ofisi Qırımtatar Milliy Meclisini Qırımnı işğalden qurtaruv halqara platformasını muzakere etmege şimdilik davet etmedi, dep ayttı.
Hatırlatamız, Ukraina Tış işler naziriniñ birinci muavini Emine Ceppar Euroactiv içün intervyü berip, Ukraina Kyivde «Qırım platforması» muzakere etilecek sammitni keçirmege planlaştıra, dep bildirdi.
Melinda Simmonsnıñ aytqanına köre, Büyük Britaniya Qırımnı işğalden qurtaruv platformasını quruv kontseptsiyasına qol tuta.
Sloveniya elçisi Tomaž Mencin Ukrainanıñ Qırım platformasını quruv teşebbüsine qol tuta, dep bildirdi.
Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.