Link açıqlığı

Saatnıñ esas haberi

Sloveniya elçisi Qırımnı işğalden qurtaruv platformasınıñ qurulışına qol tuttı – Ceppar


Sloveniya Ukrainanıñ Qırımnı işğalden qurtaruv platformasını quruv teşebbüsine qol tuta, dep bildirdi Ukraina Tış işler naziriniñ birinci muavini Emine Ceppar Sloveniyanıñ Ukraina elçisi Tomaž Mencin ile körüşken soñ.

Berilgen malümatqa köre, Emine Ceppar Sloveniyağa Ukraina suvereniteti ve topraq bütünligine qol tutqanı içün teşekkürler bildirdi.

«O, (Emine Ceppar – QA) elçige vaqtınca işğal etilgen Qırımda Rusiye tarafından bozulğan insan aqları aqqında tafsilâtlı malümat berdi, Azaq-Qara deñiz regionınıñ askeriyleştirilüvi ve işğal altındakt Qırımnıñ Rusiye arbiy bazasına çevirilgenini qayd etti. Nazirniñ birinci muavini Qırımda Ukraina kilsesiniñ blok etilgenini bildirip, halqara toplulıqnıñ işğal etilgen yarımadada diniy serbestlik ve zulumğa diqqat ayırması müim ola, dep qayd etti», – dep aytıla haberde.

Ukraina Tış işler nazirliginiñ matbuat hızmeti bildirgenine köre, taraflar BM, OSCE çerçivesinde işbirligi yapmağa añlaştılar.

Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.

2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.

Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.

Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.

2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.

Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.

XS
SM
MD
LG