Ukraina prezidentiniñ ofisi Qırımtatar Milliy Meclisini Qırımnı işğalden qurtaruv halqara platformasını muzakere etmege şimdilik davet etmedi. Bu aqta Meclis reisiniñ muavini Ahtem Çiygoz Qırım.Aqiqat Radiosınıñ yayınında ayttı.
«Bu platforma ne aqqında bilmeymiz. Biz ise – mandatı olğan Qırımdan yekâne temsiliy organmız. Haberimiz yoq, ve bu bizni pek qasevetlendire», – dep qayd etti Çiygoz.
Onıñ fikirince, «Qırım platformasınıñ» vazifeleri arasında qırımlılarnı Rusiye apishanelerinden azat etüvden ğayrı bir sıra problem olmalı.
«Qırım platforması» Rusiyege davalı şahıslarnı bermek içün tek bir qaç insannı deñişim meselesini al etmemeli. Bu Qırım platforması işiniñ yönelişlerinden biri olmalı. Onıñ esas vazifesi – Putinni (Rusiye prezidenti Vladimir Putinni – QA) köşege sıqıştırıp, Qırım meselesinde teslim olmasına mecbur etmek», – dep ayttı Meclis reisiniñ muavini.
Oktâbrniñ 20-nde Ukraina prezidenti Volodımır Zelenskıy Yuqarı Radada çıqışta bulunıp, Kyiv halqara alanda «qırımlılarnıñ aqlarını qorumaq ve yarımadanı işğalden qurtarmaq içün halqara ğayretlerniñ koordinatsiyası» içün muzakere platformasını qura, dep bildirdi.
Devlet yolbaşçısınıñ fikirince, «Qırım işğal altında qalğanda, ukrainler ve qırımtatarlar anda munatazam sürette taqip etilgende, dünya Qırımnı unutmamalı».
Ukraina prezidenti Volodımır Zelenskıy bildirgenine köre, Avropa Birliginiñ liderleri AB Qırımnı işğalden qurtaruv platformasına qoşulmağa azır, dep işandırdı.
2020 senesi oktâbr ayında Poloniya muzakere esnasına meraqlı olğanını bildirdi.
Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britani ve diger memleketler de qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge kirsetmeycek, dep qayd etken edi.
