40-tan çoq qırımlı çetelde buluna, on turist Mısırda zor vaziyetke oğradı ve yardım etilmesini talap ete.
Bu aqta Rusiye kontrolindeki Qırım baş nazir muavini İgor Mihayliçenko koronavirus yuqunçınıñ tarqaluvına qarşı tedbirler aqqında er künlik maruza vaqtında bildirdi.
«43 qırımlı: Mısır arap cumhuriyetinde – 10, Türkiyede – 11, Taylandda – 11, Birleşken Arap Emirliklerinde – 6 insan, Şri-Lankada – 1 insan, Dominikana Cumhuriyetinde – 2 insan, Abhaziya Cumhuriyetinde – 2 insan. Mısır Arap Cumhuriyetinde bulunğan qırımlılarımız zor vaziyetke oğradı», – dedi o.
Mihayliçenkonıñ aytqanına köre, bu gruppada altı büyük ve dört bala bar. Onıñ malümatına köre, turistler Mısırğa martnıñ 16-nda keldi, ve olarğa yerli musafirhaneler ve uçaqlar karantin sebebinden işini toqtatmaycaq, dep aytıldı.
Faqat martnıñ 21-nde yuqunçsızlaştıruv yapılacaq dep, qırımlılar politsiyanıñ yardımınen raatlanğan musafirhaneden çıqarıldı.
Rusiye kontrolindeki Qırım yolbaşçısı Sergey Aksenov, zarar körgenlerden olarğa nasıl etip yardım etmeleri mümkün olğanını bilmege vazife berdi.
Your browser doesn’t support HTML5
Koronavirus pandemiyası vaqtında stressnen nasıl küreşmeli (video)
Qırımda ilk koronavirus hastası tasdıqlandı.
Yarımadanıñ Rusiye akimiyeti bildirgenine köre, Qırımda hastanen alâqada olğan er kes ve atta onı alıp ketken taksi aydavcısı tapıldı ve tecrit etildi.
İşğal etilgen Aqyarda martnıñ 22-nde saba koronavirus hastaları tasdıqlanmadı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.