Link açıqlığı

Saatnıñ esas haberi

Qırımda koronavirusnen hastalanğan insannen alâqada olğan er kes tecrit etildi – Qırımnıñ baş nazir muavini


Qırımda koronavirusnen hastalanğan ilk insannen alâqada olğan er kes, şu cümleden onı alıp ketken taksi aydavcısı da, tapıldı ve tecrit etildi.

Bu aqta Qırımnıñ Rusiye ükümeti baş naziriniñ muavini İgor Mihayliçenko martnıñ 22-nde koronavirus qırğınlığınıñ tarqalmaması operativ ştabınıñ toplaşuvında bildirdi.

«Bugün hasta kişinen alâqada olğan er kes tapıldı ve tecrit etildi. Tünevin (martnıñ 21-nde – QA) saat 23:00-da onı alıp ketken taksi aydavcısı bile tapıldı», – dep qayd etti Mihayliçenko.

Martnıñ 22-nde toplaşuv başında Qırımnıñ Rusiye yolbaşçısı Sergey Aksenov, Qırımda koronavirusnen hastalanğan ilk kişinen alâqada olğan er kesni tapmağa emir etti.

Hatırlatamız, Qırımda ve Aqyarda 417 insan koronavirus şübhesinen tibbiy nezaret altında qala.

Qırımda ilk koronavirus hastası bar dep tasdıqladılar.

Martnıñ 19-nda Qırımdaki Rospotrebnadzor idaresi, yarımadanıñ tibbiy müessiselerinde «telükeli memleketlerden keskin virus yuqunçı alâmetlerinen» 18 insan buluna, dep bildirgen edi.

Qırımda koronavirus şübhesi ile evde nezaret altında bulunğan insanlarnıñ sayısı arttı. Qırımnıñ Rusiye sağlıq naziri İgor Çemodanovnıñ malümatına köre, ekimler 286 insannıñ alını kontrol ete, 22 insan hastahanelerde buluna.

Aqyarda martnıñ 21-nde 11 hasta infektsion hastahanede tibbiy nezaret altında buluna, 123 insan evde nezaret altında qala.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG