Bekirov Edem Ayderoviç – qırımtatar cemaat faali, Ukraina vatandaşı, pensioner, birinci derece saqatlığı bar. 2018 senesi dekabrniñ 12-nden 2019 senesi avgustnıñ 27-ne qadar işğal etilgen Qırımda apiste tutuldı.
1961 senesi dekabrniñ 6-nda dünyağa keldi. Herson vilâyeti Geniçesk rayonınıñ Novooleksiyıvka qasabasında yaşay.
Edem Bekirov Qırımtatar Milliy Meclisi ve qırımtatar cemaat birleşmeleriniñ çeşit aktsiya, avtoyürüş, mitinglerinde iştirak etti, cemaatçılıqnı işğalge qarşı tirenmege ve qırımtatar halqınıñ aqlarına riayet etilmesine faal sürette çağırğan edi. Qırımdaki siyasiy mabüslerge, olarnıñ qorantalarına qoltutqan edi.
Birinci derece saqatlığı bar, sağ ayağında protez taşıy, qoltuqtayaqlarnen yüre, şeker ve bir sıra diger yürek-damar hastalığı bar. 2018 senesi yanvar ayında yürekten ameliyat olıp, tedaviylenmege devam etecek edi. Ömür arqadaşı Gülnara Bekirova – Qırımtatar Milliy Meclisiniñ azası ve Geniçesk rayonı memuriyetiniñ reis muavinidir. O ve Bekirovnıñ diger aile azaları faal aq qorçalayıcı faaliyetinen oğraşalar.
Your browser doesn’t support HTML5
«Aqayım dayanır, o, küçlüdir». Edem Bekirovnıñ ömür arqadaşı onıñ apiske alınması aqqında (video)
Edem Bekirov 2018 senesi dekabr ayında Kyivde tekrar yürekten ameliyat olacaq edi. Bundan evel ise faal Qırımda yaşağan anasını ve diger soy-soplarını ziyaret etmege istedi.
2018 senesi dekabrniñ 12-nde saba Bekirov Qırımğa «Canköy» keçiş noqtasından kirgende pasport kontrolinde Rusiye FSBsiniñ hadimleri tarafından tutuldı. Bir qaç saattan soñ Rusiye uquq qoruyıcıları Bekirovnı yarımadağa alıp ketti.
SEE ALSO: «Qırımtatarlarnı ekstremist olaraq köstereler»Aqşam üstü faalni Aqmescitteki FSB idaresinde tuttılar, ertesi künü ise Kreml kontrolindeki Aqmescitniñ Kiyev rayon mahkemesi Bekirovnı «evelden añlaşıp silâ ve patlayıcı maddelerni qanunsız saqlap qalğanından» (Rusiye Ceza kodeksiniñ 222.1 maddesiniñ 1-inci qısmı ve 222.1 maddesiniñ 2-nci qısmı) şübheli sayıp apiske aldı. Qabaatlayıcı taraf, Bekirov «qabaat ortaqlarınen beraber Qırımda qanunsız areketler yapacaq edi», dep israr etti.
Dava malümatlarında qayd etilgeni kibi, Bekirov «taksicige aman-aman 12 kilogramm trotil ve 9 millimetrli 190 patron tolu çantanı berip, onı saqlamağa rica etti». Rusiye FSBsi, adı aydınlatılmağan dava iştirakçisi özü kelip Bekirovnı çaqtı, dep bildirdi. Bu şaatnıñ malümatı gizli qala.
Edem Bekirov mahkemede, 2019 senesi mart ayı
Edem Bekirov qabaatını tanımay. Advokatlar Aleksey Ladin ve İslâm Velilâyev Bekirov bütün bularnı yapmaq içün pek hasta, şaatlarnıñ aytqanları bir degil ve dava sahtelendirildi, dep bildirgen ediler.
Edem Bekirovnıñ sağlığı ket-kete fenalaşa edi. Mahkeme oturışuvlarında sıq-sıq yaramay edi. İmayecileriniñ aytqanına köre, Bekirovnıñ sağlıq vaziyetinde onı apiste tutmaq mümkün degil edi. Ukraina tibbiy müessiseleriniñ hulâsalarını tasdıqlamaq içün mabüs bir qaç kere Aqmescitteki Semaşko hastahanesine çıqarılğan edi, amma soñra kene SİZOğa qaytarıla edi.
Your browser doesn’t support HTML5
Edem Bekirov SİZOda azap şaraitlerinde buluna – advokat (video)
Bekirovnıñ apiske alınmasına Ukraina Tış işler nazirligi narazılıq bildirgen edi. ABD ve AB onı azat etmege çağırdılar.
Edem Bekirov mahkemede yazuvlı şiarınen, 2019 senesi iyün ayı
2019 senesi avgustnıñ 27-nde Aqmescitniñ Merkeziy rayon mahkemesi qırımtatar faaliniñ sıñırlav tedbirini SİZOda tutuvdan mahkemege kelmek mecburiyetine deñiştirdi.
Edem Bekirov Aqmescitteki SİZO-1-de 100 kün devamında mahsus kamerada, 158 kün tibbiy bölük tutuldı.
Your browser doesn’t support HTML5
Qırımdaki mahkeme Edem Bekirovnı SİZOdan çıqardı (video)
Edem Bekirovnıñ muracaatından alıntı:
«Menim iç bir qabaatım yoq. Olar meni boysundıramazlar. Bütün hastalıqlarımnı yumruq içine alıp, zayıf körünmeycem»