Tünevin Rusiye uquq qoruyıcıları tarafından tutulğan qırımtatar faali Edem Bekirov 10 kilogramm trotil ve 190 muarebe patronını taşuv ve tarqatuvda şeklene. Bu aqta uquqçı Lilâ Gemeci Qırım.Aqiqatqa bildirdi.
«Şaatnıñ aytqanına köre, 2018 senesi mayısta Bekirov patronlarnı ve patlayıcını şaat Memetovğa (adı ögrenile – QA) berdi, o, ise olarnı Yañı Qapudaki (Krasnoperekopsk – QA) saqlav yerine qoydı. 2018 senesi avgust ayında ise mahsus hızmetlerniñ hadimlerine saqlav yerini bildirip, Edem Bekirovğa qarşı şaatlıq etti», – dedi uquqçı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene.
Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
