Kreml kontrolindeki Aqmescitniñ Kiyev rayon mahkemesinde dekabrniñ 13-nde qırımtatar faali Edem Bekirovnıñ sıñırlav tedbiri belgilenecek oturışuv başladı, dep bildire Qırım.Aqiqat mühbiri.
Şimdi 10 daqqalıq tehnik teneffüs ilân etildi.
«Al-azırda Edem Bekirov Rusiye Ceza kodeksiniñ 222-nci maddesiniñ 1-inci qısmı ve 222-nci maddesiniñ 1.1 qısmı boyunca (patlayıcı madde ve patronlarnı saqlav ve berüv) şeklene, eki madde de orta ağırlıq ola. Şimdilik, qabaatlarnıñ sebeplerini ögrenmezden, müşterim birinci gruppa saqatı ve bir sıra ağır hastalığı bar olğanına esaslanıp, yekâne qanuniy qarar tahqiqat muracaatını red etüv ve daa yengil bir ceza berilmesi olacaq, dep tüşünem, çünki SİZOda tutulması onı qısqa müddet içinde öldüre bile», – dep tüşüne «Agora» halqara aq qorçalayıcı gruppasınıñ advokatı Aleksey Ladin.
Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
