Qırım matbuatı yarımadanıñ suv teminatı aqqında ve Rusiye anayasasına deñişmelerniñ kirsetilmesi içün rey berüvni muzakere ete.
"Krımskaya pravda" ("Qırım aqiqatı") gazetası "Bir az adalet damı ile suv" maqalesinde yarımadanıñ suv teminatı meselesini kötere ve "qanunsız otellerniñ saipleri"ni suvnıñ artıq qullanuvı içün töleteceklerini bildire. Böylece Qırım akimiyeti suv istimalına köre farqlanğan tariflerniñ kirsetilmesi ile bağlı tecribeni keñleştirecek oldı. Şimdi Sudaq ve Novıy Svetten ğayrı, Kefe, Keriç, Kezlev, Aluşta ve Saq sakinleri de yañı qaidelerge köre tölecek.
"Mütehassıslarnıñ talillerine köre, bu tedbir iqtisadiy ceetten esaslanğan ve adamlarnıñ suv iqtisatına sebep olacaq. Farqlanğan tarifler devrinde, Sudaq ve Novıy Svet qasabasında su masrafı tahminen 14%-ğa azlaştı", - qayd etti Rusiye nezaretindeki Qırım başı Sergey Aksönov.
Matbuatnıñ malümatına köre, şimdi küçük musafirhanelerniñ saipleri sade sakinler kibi suv içün töley. Amma böyle musafirhaneler defitsit olğan suvnı pek çoq masraf ete. Aynı mesele qanunsız sauna ve maşna yuvma hızmetleri ile. Şimdi olar suvnıñ ticariy qullanuvı içün ucuz fiyat tölep olamaz ve ya da şirketlerini resmiyleştirip, ya da suvnı iqtisat etip başlarlar, yaza gazeta.
"Krımskiye izvestiya" ("Qırım haberleri") gazetasında "Deputatları kelecek yarım asırğa Rusiyeniñ taqdirini nasıl tayın ete edi" maqalesinde Rusiye nezaretindeki Qırım parlamentiniñ oturışını tasvirleyler. Bu oturışta qomşu Rusiyeniñ anayasasına deñişmeler kirsetilmesi qanunı muzakere etile edi, hususan, şimdiki prezident Vladimir Putinniñ yañıda saylanmaq imkâniyeti.
"Rusiyede, memleketni birleştire bilecek ve onıñ ilerlemesini temin ete bilecek başqa yetekçi yoq", - dedi Sergey Aksöniv. - Bugün Vladimir Putin - Rusiyeniñ esasıdır, ve qırımlılarnıñ ekseriyeti, onıñ ileride de devletke reberlik yapmasına qol tutar".
"Dünyadaki ve memleketimizdeki vaziyet bir daa köstere ki, Rusiye prezidentiniñ eñ vacip devlet qurumlarını küçlendirmek içün yapqan kursu yekâne doğru kurstır, - dedi Oksana Dobrorez. - Tamam bu kurs büyük dünya krizisleri ve geosiyasiy turğunsızlıq şaraitinde Rusiyege inkişaf etmege çare bere".
Neticede 67 mebus anayasa deñişmelerine qol tuttı, ekisi bitaraf qaldı.
"Krımskiy telegraf" ("Qırım telegrafı") gazetası "Közlerge degil, raqamlarğa inanmaq" maqalesinde yarımadanıñ suv teminatı vaziyetini açıqladı.
"Qırımnıñ Nazirler şurasında, halqnıñ telâşını azlaştımaq içün, pessimistik tahminlerni yapmaq daa erte, dep aytalar. Amma barıp körseñ bile, misal içün, Aqmescit suv anbarı keçken ayda toluca olmadı. Daa yaqınlarda gölniñ teren tübü olğan yerlerde şimdi sadece yalı degil de, balıqçılarnıñ park yeridir", - yaza gazeta.
Başqa yapma göllerge barğanda, Aqmescitni temin etken Partizanskoye suv anbarı 35,5%-ga toludır. Aqmescit civarındaki Mejgornoye suv anbarını akimiyet yaqında olğan özenlerniñ suvlarınen toldurmağa teklif etti. Leyha beş yıldan soñ bitirilecek ve onıñ fiyatı 25 milliard rublege çıqacaq.