Rusiyeli Qırım başı Sergey Aksönov, noyabr 5-inde öz femanınen Albert Kangiyevni Devlet Milletlerara munasebetler ve sürgün etilgen vatandaşlar devlet komitetiniñ reisi etip tayinledi. Bu haber, laflarda ve içtimaiy ağlarda bayağı muzakere etildi.
Amma bundan evel - Yuriy Gotsanük artıq bir aydan çoq rusiyeli Nazirler Şurasınıñ reisi vazifesini becergenine baqmadan, ne içün Qırımnıñ rusiyeli ükümetiniñ reberlerini alâ daa Aksönov tayin ete? Demek, yuqarı rutbelerniñ bölünmesi sadece resmiyetçilik edi, işte Aksönov da bunı gizlemedi, evelleri Qırımda "em qıral, em tañrı" olğanı kibi, şimdi de öyledir.
Amma Kangiyevniñ qoyulması meselesine qaytayıq. Yerli şuralarğa rusiyeli saylavlardan evel, rusiye tarafdarları olğan qırımtatarlarnıñ lideri kibi özüni köstergen, Rusiye Devlet Dumasınıñ mebusı Ruslan Balbek, Kangiyevni öz taqımına celp etti. Kangiyev, bu yıl sentâbr ayında saylavlarda qırımtatarlarnıñ faalleştirmesi içün, oña yüksek siyasiy rutbe berilecegi vade etilgenini tanışları arasında ayttı.
Ruslan Balbek
Saylavdan soñ vaqıt keçe edi, yañı reberleri tayinlene edi, eskileri başqadan qoyula edi, Kangiyevniñ soyadı ise bir yerde körünmey edi. "Siyasiy rutbe" yerine, oña kene Qarasuvbazarnıñ reberligini becermege buyurırlar, dep laflar çıqıp başladı. Amma Qarasuvbazarda da "Yekâne Rusiye" partiyasınıñ yerli bölüginiñ reisi İgor İpatkonı, yañı memuriyet başlığı kibi sayladılar, rayon memuriyetiniñ başı ise olağanı kibi Galina Pereloviç qaldı.
Qırımtatar cemiyetinde Albert Osmanoviçniñ itibarı bayağı eksilgen
Yalıñız Devlet Milletler Komitetiniñ başı, genç Lenur Abduramanovnıñ işten çıqarılğanı aqqında haber kelgende, bu vazifeni Kangiyev içün azırlağanları añlayışlı oldı. Mantıqlı bir arekettir. Kangiyevni belli olmağan Abduramanovnen qıyaslamaq bile kelmez. Büyük idare tecribesinden ğayrı, Kangiyevniñ qırımtatar halqı arasında büyük itibarı bar. Onıñ Qarasuvbazar iş adamları - Velilâyevler ağa-qardaşınen şahsiy dostluğını, em de başqa itibarlı qırımtatarlarnen sıqı bağını közde tutsaq, Kangiyevniñ Balbek taqımına qoşulğanı - soñkisi içün büyük bir yeñiş olğanını köremiz. Amma, bütün bulardan soñ qırımtatar cemiyetinde Albert Osmanoviçniñ itibarı bayağı eksilgenini de qayd etmek kerek. Belli ki, qırımtatar halqınıñ ekseriyeti Ukrainağa taraf baqa.
Amma meni eñ pek şaşırtqan - içtimaiy ağlarda rusiye tarafdarları olğan faallerniñ yayğarası edi. Misal içün, Kangiyevniñ tayinlevi aqqında "Rossiyskaya gazeta"nıñ Qırım muarririyetiniñ muarriri İlya İzotovnıñ yazısına, Qırımda belli olğan bayağı faal açuvlı tefsirler qaldırdı. Devlet Milletler Komitetiniñ yañı başına ne tek demediler - "boyasını deñiştirgen", "papuçını deñiştirgen", "meclisçi" ve ilâhre...
Bellese, mında mesele Kangiyevde degil, amma ağlardaki ve kerçek faallerniñ qırımtatarlardan qorqusındadır. 2014 senesi olar özlerini ne qadar bol duyıp başlağanını pek yahşı hatırlayım. Vesiqalarnı deñiştirgende uzun-uzun nevbetlerde turıp, qırımtatarlarğa qarşı "artıq vaqtıñız keçti" laflarını bir çoq kere eşite edi. Amma quvanmasınlar, qırımtatarlar, tuvğan toprağında ve öz siyasiy printsiplerinde qattı tura.
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün