Tünevin Qırımda eki adam boğulıp battı ve bir kişini qurtardılar, dep bildire Rusiye FVN-niñ Qırım idaresi.
Müessise malümatına köre, sentâbr 12-sinde batqan aqaynıñ cesedini Yedi Quyu rayonında taptılar, daa bir cesedni - Sudaqta, yalıdan 150 metr uzaqlıqta, adamnıñ şahsiyeti belgilenmedi.
FVN, Aluştanıñ Tuvaq (Rıbaçye) köyünde de bir aqaynı qurtarganları aqqında bildire.
Qırım FVN-niñ başı Sergey Şahovnıñ malümatına köre, yılnıñ başından 79 suv qazası oldı, olarnıñ neticesinde 55 elâk oldı.
Qırımda havflı ava şaraiti aqqında ihtarnı sentâbr 16-sına qadar uzattılar.
Sentâbr 11-inde Keriç boğazında Fener burnunda, deñizge ketken balanıñ qıdıruvı yapılğanı, bildirilgen edi. Keççe Keriç yalısında ğayıp olğan ösmürni 130 qurtarıcı ve 58 göñülli qıdırğanı belli oldı. Tahqiqat Komiteti, ösmürniñ ğayıp olğanını teşkerip başladı.
Tınmağan furtuna: Yaltada beş künden berli deñiz qaynay (süret toplamı)